حد فاهم حاجة ؟؟ بالظبط الصورة دي زي دنيتنا المتلخبطه اللي ماشيين فيها واحنا مش عارفين اخر الطريق هيودينا فين بالظبط , سواد ولا نور جهل ولا علم . بصيرة ولا عمى. طريق صعب ولا طريق سهل وبسيط
يمكن يودينا على مكان كويس نتمناه كلنا ويبقى طريق خير وسعادة وفرح ,ويمكن يودينا على طريق صعب وشاق زي ما الدنيا بقت صعبه وغريبة وعجيبة, صعبانة عليا الدنيا بجد مشكلتها انها عامله زي الصورة اللي رسمتها دي محدش عارف فيها حاجة واللي بيعرف فيها حاجة بيتحطلوا ملايين من علامات الاستفهام حواليه .. والناس بتفتكروا هو اللي غريب الأطوار مع إن الدنيا هيا اللي غريبه بجد زي ما قلت وهقول ولسة بقول
"الزمن غدار تقسى عليه مره يقسى عليك مليار" فعلا لو قسيت عل زمن وكشرت عن أنيابك هتبقى دنيتك سودة وهتقضيها
سواد في سواد
بجد عايزة أعرف هو فيه كده ؟؟ فيه دنيا زي اللي احنا فيها وبنعيشها بالشكل ده ؟ يااااااااااه بجد صعب أوي اننا واقفين وحاطين ايدينا على خدنا وبنقول هتعدي طيب إزاي هتعدي وإحنا بنتفرج على اللي بيحصل أكنه مسلسل مش من جزء ولا جزئين ولا تلاته ده مسلسل اجزائه مبتخلصش ابدا ده مسلسل كل يوم بتزيد عدد حلقاته واحنا كالعادة من بعيد لبعيد أكن الدنيا مرض معدي هيا فعلا مرض معدي ومش معدي بس لا ده مستعصي كمان .. قلبي مليان اَهااات نفسي أكتب وأخرجهالكم في كتاباتي بس حسا السواد اللي احنا فيه خلانا مش بس مش قادرين نكتب لا مش قادرين نتكلم ولا نوصف ولا نعبر على اللي إحنا فيه . صعبانه عليا يا دنيااااا بجد
أصحى يا حق وفوق ده الفقر هد حيلنا بجد هدنا ولسه هيهدنا أكتر . مش فقر الجيب ولا الماديه لا فقر القلب والمشاعر والحنيه
فقر البصيرة والاخلاص يااااه بجد فيه كده ؟؟ كل يوم الدنيا بتسود أكتر من اللي قبله مش في نظري بس لا في نظر كل اللي حوالينا قدامنا وورانا طريق أسود طويييييييل أطول من طريقنا اللي عايزين وبنخطط عشان نوصله ,عارفين ايه الطريق ده ولا مش عارفين؟
طريق الجهل والعمى طريق الأنانيه اللي موجودين في الزمن ده .بس خط النهايه قرب بجد والمسلسل ذات الاجزاء اللامنتهيه قرب من حافه الهاوية .المشكله مش بس فينا احنا المشكله في اللي حوالينا في الدنيا في الجرح في الاسى في العناد في الظلم في كـــــــــــــــــــــــل اللي حوالينا مش بس احنا الغلط اللي قدامنا واللي ورانا غلط في غلط .حسا نفسي بتكلم الغاز بس اللي عايش في الدنيا دي أكيد هيفهم قصدي ويعرف ان الدنيا باللي فيها متستحقش نزعل عليها ,إن الدنيا وما فيها قصه واتكتب اللي فيها واللي ليها , بجد الدنيا دي أكبر قصه في الدنيا
عامل زي حدوته المسلسل اللي مبيخلصش, الدنيا بردو نفس النظام قصه ..حدوتة.. رواية . لالا أكبر من كل ده ولله .. الدنيا عامله زي الطفل , أزاي وليه ؟؟ ايوة عامله زي الطفل اللي لو ضحكت عليه بكلمتين هيسكت ويبطل بكاء , زي ما بتعمل مع الطفل أعمل مع الدنيا أضحك عليها وسكتها بكلمتين وهيا هتعدي وتمشي وتبقى كويسه , لو وجعت دماغك ودققت على كل كلمه وكل حركه وكل فعل وكل موقف هتاخد فوق دماغك وتتعب نفسيا وجسديا وهتكره اليوم اللي أتولدت فيه ولله , ف ليه منختصرش الموضوع ونحاول نخلي الروايه قصه والقصه حكايه والحكايه حدوته عشان المسلسل بدل ما هو لا متناهي يبقى مية جزء والمية جزء يبققوا عشره والعشرة يبقو جزء لحد ما نخلص كل حاجة في حلقتها وفي يومها , بكده هنعيش صح وهنفهم صح وهنرتاح أخر حاجة .بدل ما جهلنا يعمينا على اللي قدمنا كفاية انه عمانا على اللي ورانا متخلهوش يعمينا تاني عشان متلومش نفسك بعد اللي هيحصلك من وراه الجهل. كان فيه حديث عن الرسول
- عليه أفضل الصلاة والسلام - بيقول في ما معناه إنك لما تقول كلمة حاول تفكر في معناها الاول عشان تشوف هيا كدة محلها صح ولا غلط .. طبعا كلنا بنغلط ومش معصومين عن الغلط بس معصومين عن الاستمرار في الخطأ والشاطر اللي بيصلح من نفسه مش اللي مستمر على هو فيه ده .الحمدلله على كل حال .. في حلقة "المعز مسعود" مع الدمرداش كانوا بيتناقشوا عن حال الدنيا والي فيها فقال المعز مسعود كلمه حلوة أوي فرحت قلبي وقلوب ناس تانيه كتير اوي سمعوها ولما هيسمعوها دلوقتي بردو هيفرح قلبهم وينشرح من سماحة الله لنا . قال ايه بقى الاخ مسعود . بيقلك لما تكون مكتئب ومضايق من دنيتك ومن حالها قول الحمدلله واقرأ سورة الفاتحه هتلاقي ربنا بيرد عليك في كل كلمة بتقولها يعني لما تقول الحمد لله رب العالمين ربنا هيقول "حمدني وشكرني عبدي " لما هتقول مالك يوم الدين ربنا هيقول " أثني على عبدي" لما هتقول اياك نعبد واياك نستعين ربنا هيقول "عبدني عبدي واستعان بي فأغفر له وأشرح له صدره" يااااااااااااااااااااااااااااه بجد حاجة بتخلي جسم البني اَدم يقشعر لما تعرف ان كل كلمة بتقولها وانت بتقرا القران ربنا بيرد عليك فيها بجد بجد شعور رهييييب أنتابني وأنا أكتب ما قرأتموه , حتى وانت بتتشهد وبتقول السلام عليك أيها النبي الرسول الحبيب المصطفى عليه أفضل صلاة وأفضل التحيات رحمه الله ونوره عليه بيرد عليك وبيقلك وعليك السلام ورحمة الله وبركاته !! تخيل إن رسولنا الحبيب الكريم بيرد علينا احنا البشر وربنا سبحانه وتعالي كمان بيرد علينا ياااااااااه بجد كلام ولا أحلى وشعور ولا أجمل منه لما تعرف إن ربنا سبحانه وتعالي رحمن رحيم علينا وبيغفرلنا ذنوبنا كلها .. "اللهم أرحمنا يَوْمَ تَبْيَضُّ وُجُوهٌ وَتَسْوَدُّ وُجُوهٌ , اللهم أرحمنا يَوْمَ يَقُومُ النَّاسُ لِرَبِّ الْعَالَمِينَ ,
اللهم أرحمنا يَوْمَ يَكُونُ النَّاسُ كَالْفَرَاشِ الْمَبْثُوثِ , اللهم أرحمنا يا عَلِيمٌ بِذَاتِ الصُّدُورِ . اللهم أغفر لنا خطيئاتنا، وجهلنا، وإسرافنا في أمرنا، وما أنت أعلم به منا. اللهم أغفر لنا جدنا وهزلنا وخطأنا وعمدنا، وكل ذلك عندنا. اللهم اغفر لنا ما قدمنا وما أخرنا، يا ذا الجلال والإكرام....
ليست هناك تعليقات:
إرسال تعليق