الخميس، 8 يوليو، 2010

ملاك حياتي


لاول مره أحس أني معاه زي الملاك

يا أغلى من روحي وعينيا حياتي كلها ملكك حياتي كلها فداك

أوعدك أني أحبك وأخلي بالي من روحك

ومن حياتـك معايا لاني أغـلى وأحـن من أي مـلاك

الجمعة، 25 يونيو، 2010

كنت هسمعكم سلام الوداع على المدونه

صحيت من كم يوم قلت أفتح المدونه >> لا يا شيخه ربنا يديكي الصحه والعافيه ولله
وأحاول وأحاول وأحاول ملقتهاش بتفتح >> مش كفايه مش بتدخليها الا في المناسبات كمان مش بتفتح يلا كملت

طيب أكتب الباسورد شمال يمين يمين شمال مفيش فايده >> طب جربي تكتبيه من فوق لتحت او من تحت لفوق مثلا

طب اعمل ايه؟ وايه الحل؟ اعمل مدونه جديده طيب؟ لالالا يمكن >> لايونكن ولله ابدا

جربت كل حاجه اعرفها في الباسورد والايميل >> لو البلوجر ده بتاعي كان زماني بعتلك رساله اقولك يلا من هنا ومفيش ايميلات ولا باسوردات عل كميه اللي جربتيها دي يا مفتريه

وفجأه قلت طب اجرب اكتب الباسورد بالعربي يمكن يكون في أمل >> اهوو اللي عايز يهكر المدونه مفيش اي مشكله الباسورد بالعربي يا جماعه الهكريه

والحمدلله فتح وبقى تمام التمام...

ايه كل الرغي اللي فوق ده >> ناس فاضيه ولله

فاضيه مين بس ده انا خلصت امتحانات من هنا واعدت في البيت اسبوع ما بين راحه ونوم وزيارات للأهل وفجأه لقيت الفصل التالت بيبتدي
عااااااااااااااااااا >> وش بيعيط ومقهوووووووووور
والحمدلله مفيش نزول على مصر الصيف ده وهصبر لحد ما يجي الشتا >> ايوا ايوا اهربي من عزومه رومانسي اللي هيعزمهالك >>وكمان نصابه *_*

الا ايه رأيكم في النيو لوووك بتاع مدونتي ولله اول ما دخلت لقيت انهم منزلين تيمبليست جديد فقلت يلا نغير وماله بس حفاظا على تغيير الروتين هبقى اغيرو كل كم اسبوع كده عشان النفسيه النفسيه يا بت يا بهيه *_*

اصل الروتين بتاعي مهبب اخر حاجه لدرجه اني قررت فجأه ومن غير مقدمات أني اتعلم لغه جديده غير الانجلش بتاعي واخترت لغه مفيش الا خمس ست بلدان بالكتير بيتكلموها حد يعرف ايه هيا ؟ طب خلاص هقولكم

"اللغه الهنغاريه" اللي هيا المجريه

بصراحه شدني اوي كلامهم وحبيتو من اول نظره وفي بنا كيميا عاليه اوي لدرجه اني اشتريت كتاب من عل نت بيعلمك اللغه بالصوت
عشان نطق كلامهم يختلف تماما تماما عن الانجلش هوا قريب من الفرنساوي شويه يعني عندهم حروف قريبه جدا في نطقها زي ő ö é í و الحمدلله خلصت منها بتاع 20% تقريبا يعني مبقاليش يومين تلاته بادئه فيها ادامي شهرين كده ولا تلاته عشان معطلش وقت دراستي
واكون خلصتها واغيظكم بقى نيييييييييهاهاهاهاهاهااااااا

يلا بقى Szeretlek az összes
يعني بحبكم كلكم بالهنغاري

السبت، 22 مايو، 2010

إنكسار قلب امرأه



ضحكنا سوى

تعلمنا معنى الحياه معا

ضحكته كانت فرحتي

ابتسامته كانت اشراقتي

عيناه كانت سبب فرحتي

دمعتي

سعادتي

شجاعتي

كنت أرى وجه الحياه المؤلم في انكسارته

كان كالملاك في براءته

في ضحكته

في رقته

عرفت معه معنى الرومانسيه

معني للحياه الاستقلاليه

معني المسؤليه

معنى للمشاعر العاطفيه

معنى للأحلام الخياليه

ولكن...

فجأه غير كل الفجئات

عرفت طريق للدمعات

للأنكسارات

للأوهام والخيالات

غاب عني وذهبت كل الذكريات

كحلم وردي من احلام الحياة

كوردة يابسة على الطرقات

كأصوات صريخ واستغاثات

كأبشع الصور واللوحات

كيوم يمر كالسنوات

كليله تواجه ظلم الليلات

ولكني لن أقف لدقائق أو للحظات

سأستمر وسيمتلئ قلبي من جديد بالدقات

وسيعرف طريق الضحكات

وسأرسم كلمه أحبكــ في كل الصفحات

الاثنين، 3 مايو، 2010

انا جيييييييييييييييييييييييييييت





ازيكم يا حلوييييييييين انا جيييييت من الاجازه .. طبعا انا خدت اجازه طويييييييله

كانت كلها مليانه احداث كلها

أوحش من بعضها بس حبي ليكم

وفضولي اعرف اخبار كل واحد فيكم ايه ؟؟

كنت قاعده في امان الله في المحاضره وفجأه كلكم خطرتو على بالي

فقلت لازم ادخل اقلكم اني رجعت وهفضالكم كلكم

وان شاء الله مش هغيب تاني مع ان امتحاناتي قربت

بس بردو هفضل معاكم ومش هغيب

كفايه بعد بقى هههههههههههه المهم انكم وحشتوووووني اوي

وان شاء الله هغير شكل المدونه في اقرب وقت

عشان لزوم التجديد بقى

وهلغي الاشراف عشان خاطر الاستاذ الجميل أحمد .

وحششششششششششششششششتوني موووووووت

الاثنين، 25 يناير، 2010

صعبانه عليا نفسي

كل الحلوين اللي سألو عليا عايزه اقولهم اني لسه في المووود اللي رايح شمال
حتى نتيجتي طلعت من يومين ونجحت في كل المواد وجبت تقدير جيد جدا مرتفع
وعاااااااااااااااااااادي جدا حتى الابتسامه معرفتش طريقها
يارب مصر تفوز النهارده
بحبــــــــــــــــــكـــــــــــــــــــــــــــــم اوي
طق حنك :::: نتيجتي النهارده ادعولي ربنا ينجحني في كل المواد
لاني مخرفه في ماده ولا مادتين ولا تلاته كمان ولله ما انا عارفه
ادعولي بجد لاني قلقانه وتعبانه
الف مبروك لأم الدنيا
عايزه اقولكم اني مش مبسوطه معرفش ليه حالي مش عاجبني
انا يعتبر نسيت حاجه اسمها التدوين والبلوجز والكلام ده كلو
حتى الاغنيه حاولت اغيرلها يمكن تغيرلي مودي في البلوج بتاعي معرفتش
طب تصدقو الانيل اني كنت ناسيه منين اكتب الرسايل
ومنين اشوف التعليقات وناسيه كل حاجه بجد..
فعلا انا مش مبسوطه ومش عارفه ليه اتقطعت عل تدوين وهتقطع تاني عنو
بس حسا انكم وحشتوني وفي ناس كتير نفسي اتكلم معاها واعرف اخبارها واحوالها
انا عارفه ان الكل زعلان مني ومضايق مني وعليا بس انا بجد الفتره اللي فاتت
كان حالي مش ولا بد ومازلت
ده انا كلمه مصر اللي بعشقها اكتر من روحي بقت دلوقتي شئ اقل من العادي عندي لدرجه اني فيها حاليا من اقل من يومين ومش حساها
يا ترى حد مر بالشعور الغريب ده قبل كده ولا انا اللي بهيس؟؟

الجمعة، 30 أكتوبر، 2009

ياليتني نحلة + تحديييث

تحديييييييث : يا جماعه في واحد لذيذ بيدخل يقول كلام قليل ذوووق مش عارفه اعمل معاه ايه
ومش عايزه انزل تعليقه البايخ
فياريت يحترم نفسو لو سمحت ولو مش عايز يحترم نفسو ياريت ميدخلش هنا تاني ... اوكي ؟





حينما رأيته تذكرت ما قيل لي الحب ما هو الا معزوفه موسيقية
تنسجم معها المعاني والكلمات
ولكن ما هي الا ذكريات
معانيها الحب والامنيات
حب خلق لكي نعشقه
بروحنا
بأجسادنا
بأفواهنا
بعقلنا
بقلبنا
ليس كحب استغلالي
ولكنه حب أبدي
حينما تراه تتذكر زقزقه العصافير في الصباح
تتذكر ضوء القمر في المساء
وهو مخلوق مثلنا من طين
ولكنه يحمل بداخله قلب ذهبي
عيناه تدل على الامان
اسرح فيهما وبداخلي بركان
بركان شوق وحنان
ياليتني كنت نحلة أمص رحيق شفتيه
ياليتني أرسم شعره المنسدل على وجنتيه
ياليتني أداعب خديه
كفيه
ويديه
أبكي ساعات ويضمني الى صدريه
وأكتب أحبك بأصابعي على كتفيه
أستنشق عبيره وانا كالطفله بين زنديه
وفي عيني نظر فجأة بعينـه
وجدهما متلألأن فضمني ونمت كالطفلة على كتفيه
فأقتربت أكثر لملامسته
فأنسجمت رائحتي برائحته
بعيد عني أم قريب أشتاق له
لدفئ صدره لجماله أشتاق له
لعيناه
ليدياه
لكفاه
لشفتاه
لشعره
أشتاق له
بعيدة عنه أم بجانبه أشتاق له

الاثنين، 26 أكتوبر، 2009

صور عاريـة

حب الدنيا والتلذذ بهذه الدار الفانيه
ما هيا الا صوره عاريه من الفهم الصحيح لما يجب ان يكون عليه الانسان
نسيان الوالدين وعقوقهم ونسيان طاعتهم ورحمتهم
ما هيا الا صوره عاريه من الاخلاص والود والوفاء
السعي في الفساد ليلا ونهارا واكل حقوق الاخرين
ما هيا الا صوره عاريه من مخافه الله عز وجل والخوف من عقابه
ترك الصلاه وعدم التعبد لله وحده
صوره عاريه من عدم الخوف منه والحذر من عظيم سطوته وشديد انتقامه
تجاهل دمعه طفل بكى على أخذ أصفر وأتفه الاشياء لديه
صوره عاريه من رقه القلب والاحساس بالاخريين
صديق مقرب لك عاتبك في يوم وزعلت منه زعل شديد وقررت عدم مكالمته
صوره عاريه من التسامح والاخلاص والعفو عند المقدره
كلمه من اربع حروف "أحبـــك" قالتها لك حبيبتك وتجاهلتها فكان الفراق هو مصيركم صوره عاريه من رقه القلب والاهتمام والخوف على حبكم
كلمه احبك يا امي تقولها كل يوم 21 مارس
صوره عاريه من رضا الام والرقه في التعامل معها والحنيه عليها
كلمه احبك يا امي تقولها عندما تأخد المال منه
صوره عاريه من رضا الاب والرقه في التعامل معه والحنيه عليه
....
صور عارية من الوفاء ورد الجميل فهل جزاء الإحسان إلا الإحسان !!
فهنيئا لكم هذه الحجارة التي تحملون بين أضلاعكم وتسمونها القلوب!! هنيئا لكم

الأربعاء، 21 أكتوبر، 2009

وتاني تاني تاني ورجعنا تاني تاني

وحشتوووووووووووووووووووووني كلكم يا أرق مدونين ومدونات انا اسفه
اني غبت عليكم كل الفتره دي بس بجد ظروفي مكنتش تسمح ادخل
واكتب بوستات وارد عليكم يعني النفسيه كانت في العالي اوي عندي الفتره
اللي فاتت بس الحمدلله بقيت تمام لحد ما
طمنووووووني عليكم كلكم بجد كتيييييييييييييييييييييييير وحشني
خصوصا اللي غايبين عليا كام بوست ومش بيدخلو يسألو ولا يطمنو
ماااااااااااااااشي ماشي ياللي في بالي وهو او هيا عارفين نفسهم يلا مش مشكله
ادعولي لان دراستي السمستر ده صعبه جدا و راح مني اسبوعين تأخير
على الجامعه ولحد دلوقتي بتحمل مسؤوليتهم وبكتب اللي ناقصني وبذاكرهم وطالع عيني
بس بأذن الله كلو هيعدي على خير بس انتو ادعووووولي
هدخل بقى اطمن عليكم واحد واحد وواحده واحده
ومبرووووووووووووووووووووووووووووووووووووووووك لنادي القرن الاهلي
اللي دايما رافع راسنا فوق على فوزه على المنصوره 2-1
وعقبااااااال فوز منتخب مصر على تنزانيا الحمقاء و الجزائر الخضراء
وسلاااااااااااااااااااااااااااااااااااااااااااام كبير ليكم كلكم

السبت، 10 أكتوبر، 2009

ورجعنا للنكد تاني

مش عارفه اقول ايه ولا ابتدي منين ولا اعيط ولا اسكت وخلاص بس كل اللي اقدر اقولو انكم بجد
هتوحشووووني جدا
وكل حته فيكي يا بلدي هتوحشني زحمتك ودوشتك وروحك وشعبك وكل حاجه فيكي بجد هتوحشني اوي لحد ما ربنا يسهل واشوفك
في نص السنه او في اخر السنه الجيا بأذن الله :( بجد انا زعلانه اوي وحسا اني خلالالالالالالالالالالالالالالاص
هرتكب جريمه في اي حد اشوفو قدامي كلهم بيقولولي اني بدلع وبحب مصر زياده عن اللزوم
وانها متستحقش الحب ده كلو بس عايزه اقولهم طب لو متستحقش الحب ده كلو مين اللي يستحق بس ؟ :(
انا مسافره في طياره بكره الساعه 11 الصبح بأذن واحد احد وهرجع للدراسه والغم والنكد
وربنا يستر لاني متأخره عل دراسه اسبوعين وشكلي في الضياااااااااااااااااااااااااااااااااااااع خالص
بس هعمل ايه كلو فداكي يلا بلادي وعلى رأي اللي قال يا بلادي يا بلادي يا احلى البلاد يا بلاااااااااااااااااااادي ..
بجد بحبكم جدا جدا جدا ومش عارفه هدخل تاني امتى بس ان شاء الله هدخل من الجامعه اول ما اروح
عشان النت اكيد اتقطع من عندنا يلا بقى طولت عليكم ووجعت دماغكم
بس اعرفو حاجه واحده انكم كلكم في قلبي وكل واحد له مكانه خاصه في قلبي

الأربعاء، 30 سبتمبر، 2009

تحشيش المحشش + تحديييث



تحدييييـــــــــــــث : أعذروني بجد لاني مش بزوركم ولا بدخل ازور مدوناتكم ده بسبب نفسيتي اللي في العالي اوي
مش عارفه ايه السبب المقنع لنفسيتي الجامده جدا دي بس ربنا كبييييييييييييييييييييييييييييييييييييييييييييير
هحاول بجد ازوركم كلكم بس أدعولي

يالي واخد في جنابك وتقول معيش شايفها سهلة وسايبها في المضـــــــــــــمون

جرب يمكن يا تيجـي يا متجــــــــيش ما هو الحظ بيجي مع المجنـــــــــــــــون

متكل عل علاوه ولا عل بقشيش مش كل مره الكوره بتيجي في الــــــــــجون

بتحب الطناش وتقول مفيش هتبقى حياتــك خربانـه و في اللــــــــــــــيمون

بطل تحشش وتشرب بانجو وحشيش مين عارف يمكن العشره في ايدك تبقى مليون

مش كل مره تقضيها شارم والعريش فاكـــر نفســـك واد مزه ومفتــــــــــــــون

ده شكلك مدهول واخر تحشيش ومنك يخاف ابليــــــــــــــــــس الملــــعون

وعشان حظك في الدنيا مفيش حياتك كلها من غير لا طـــــعم ولا لــــــون

مش لاقي تاكل ولا عارف تعيش البس حــــــــــــزامك من غير بنطـــــــلون

خلصت حياتك وخلص الحشيش ومش لاقيه حاجه اخرها حرف نــــــــون

الأحد، 20 سبتمبر، 2009

كل سنه وانتو دايما حلوين

بجد وحشتووووني اوي اوي اوي والفتره اللي فاتت كانت اسوأ فترات حياتي والحمدلله تخطيت الفتره دي على خير ورجعتلكم
وقربت اسافر الامارات وارجع لدراستي وجامعتي وصحابي وحشتووووووووووووووووووووووووووووووووووني بجد
كل سنه وانتو بألف خير يا حلويييين وحلواااااااااات وعيد سعيد عليكم وعلى كل اسرتكم الطيبه ويارب تحققو كل امانيكم على خير
يلا بقى هروح اقرا بوستات كل واحد فيكم واعذروووني بجد على الفتره اللي ضاعت مني غصب عني
بحبكم اوووووووي

الأربعاء، 5 أغسطس، 2009

أزواج مقطوعة عن الخدمة




أزواج نـــص كــم
=================

أعتدت عند دخولي منزل الزوجية على شكله المريح نفسيا والمهدئ للأعصاب كحبوب أنفرانيــل
ولكن لم يستمر الأمر طويلا ... فقد كانت بضعة شهور كفيلة أن تغير زوجي


"ايه اللي انت مهببـو في البيت ده يا محمد وبعدين من امتى بتلبس سلسله في رقبتك ان شاء الله ؟ "
"سيبك من السلسله دلوقتي خالص وبعدين امال انا متجوزك ليه ؟ مش عشان تظبطي وتمسحي وتكنسي وتغسلي وتطبخي
وتنضفي وتلمعي وتأمعي " وتــ وتــ وتــ .....

"ومسكت السلسله من رقبته عشان تشوفها لقت حرف الأس عليها وبدأت بالصراخ لكي يخبرها من هيا التي تبدأ بحرف الاس "
"في ايه يا حبيبتي انتي نسيتي ان أم أم جدتي أسمها سميحه ؟ ولا انتي بتحبي المشاكل والخناق بس !! "

فأنصدمت المسكينه من كلام الزوج الجارح الذي يظن إنه سي السيد وطلباته مجابه سواء رضيتم أم أبيتم
فهمت بالخروج من الغرفه اللعينه التي تجمعهما سوى فتعثرت خطواتها "بكانز بيبسي" فألتقطتها وكملت خطواتها
وتعثرت مرة أخرى "فعلبه سجاير من النوع الردئ "
إلى أن وصل به الأمر برمي جميع ملابسه على الارض "قمصانه و تيشرتاته

و بنطوناته وجينزاته بسلطاته ببابا غنوجه"
وأنتهى الشجار على :


"اصل سميره مرات حازم صحبي مبتقوليش لا ابدا على حاجه بطلبها منها "




الرجاله ماتت في حرب أكتوبر

===================

تفاجئت بكلام أختي عندما قالت لي بأنها رأت أحمد خطيبي في الشارع وهو بصحبة أحد الفتايات ممسكاً بيداها
ظننت في بادئ الامر بأنها تريد أختبار غيرتي على خطيبي وأصطنعت البردو الشديد وقلت لها بكل بساطة :

"هتلاقيه واحد تاني شبهه يا حبيبتي"
فأجابت " بقولك مريت من جمبه وشميت ريحه البرفان التقليديه بتاعتو وشوفت الوحمه اللي طالعاله في جبينه "

فبدأت أشعر بالخيانه والغدر وأمسكت بهاتفي النقال وأتصلت به على الفور لأسأله على صحه الأمر فأجابني "
"مين اللي قلك الكلام الفاضي ده يا سوسو ده انا هنا في البيت بذاكر من اول النهار ما طلع
ده حتى الفطار والغدا والعشا مقومتش من مطرحي عليهم
" ده حتى الصبح و الظهر والعصر والمغرب والعشا مقومتش أصليهم من كتر ما انا مندمج في الكتب "
"ده حتى موبايلي من اول اليوم وانا قافله ويدوب يدوب لسه فاتحه عشان أتصل بسمير صحبي اسأله على حاجه في المقرر"

"ده حتى ... وقطع كلامه صوت صديقته بجواره بقولها :

"الحمدلله يا حماده حجزت أخر تذكرتين سينما موجودين أصل الطابور زحمه اوي"



جوازة الندامة وفي العنوسة السلامة
=======================

ظننت في بدايات زواجي بفتى الأحلام بأن حياتنا ستصبح وردية طوال العمر فقد كان أشبه للملاك

وجميع طلباتي قبل أن أطلبها مجابه تماما


"أما انا شوفت حتت فستان النهارده يا حبيبي في المجله يااااه أمنيتي يكون عندي اخوه "

"واخوه ليه بكره الصبح يكون عندك تؤامه والصبح ليه ما احنا فيها ننزل دلوقتي نجيبو يا حبيبتي"


"أما انا النهارده يا حياتي تعبانه اوي ومطبختش حاجه "

"ولا يهمك يا قلبي يعني كنتاكي وهارديز وماكدونالدز وتشيلز راحو فين"


"أما انا نفسي اخرج على النادي اللي كنت بتقابل في انا وصحابي يا حبيبي اوووي "

"لالا يا قلبي أخاف عليكي تخدي نسمه هوا وتتعبي منها خليكي جمبي املي عيوني من جمالك"


" أما انا ...... أما انا ....... أما أنا ......... "



وبعد مرور ثلاثه أشهر

--------

"مطبختيش ليه النهارده يختي هو أنا اشتغل طول النهار عشان أرجع الاقيكي مش طابخه "

"ما انتي دولابك كله فساتين ولا فالحه تصرفي تصرفي تصرفي اه ما انتي متجوزه البنك اللي ابوكي جبهولك "

"الجو النهارده تلج متروحي تخرجي انتي وصحابك على النادي "

السبت، 25 يوليو، 2009

اعتذار

تحدييييييييييييييث جديد :
ولله انا عند كلامي للي عايز يتعزم بس ايه يخف شويه عليا :@:@
والمكان اللي بتاع لقاء المدونين ياريت ياريت يبقى قريب شويه مني من مدينه نصر يعني :@
و 8-8 بعيد اوي خلوها اخر الاسبوع ده ولا اول اللي جي :@:@:@:@
يلا يا جماعه نزلتلكم مصر اوم الدنيا واللي عايز اي خدمه مني انا تحت الامر كلكم على راسي من فوق
انا عايزه اقولكم اني مبسوووطه جدا وبشكر كل واحد قلي حمدلله عل سلامه والناس اللي عايزه تتعزم
معنديش اي مشكله ولله اهم حاجه اني اشوفهم واتعرف على شخصيات حلوة زيهم
يلا بقى شوفو عايزين تتعزمو فين وامتى :d
انا اسسسسسسسسسسسسسسسسفه جدا جدا عل تأخيييييييير بتاااااااااااااعي جداااااا جداااااا
انا وصلت اخيرا ام الدنيا يا جماااااااااعه وحسيت اخيرا بالراحه والطمأنينه اللي مستنياهم بقالي تسع شهووووووور
كل حاجه في مصر وحشاااني بكل ما فيها وحشاااااااااااااااااااااااااااااااااااااااااااااااني
سامحوني بقى عشان بجد كنت مشغووووله جدااا جدا ومش بدخل نت خاللللللللص

About Me

صورتي
تقدروا تقولوا بنوتة متواضعه بحب كل الناس مجنونه و عاقله حزينه وفرحانة طفله وكبيرة طيبه وشريرة فيا كل الصفات بس اولهم واخرهم رومانسية وحالمة وده عشان بحب ابتسامه كل حد. وبحب اشوف ضحكه اي طفل وفرحتو على وشوا وضحكه اي ست على وشها بحب اشوف الفرحه في عيون الناس بحب اضحك اي حد مضايق واسمع همومه يحكيلي واحكيلو .