الأربعاء، 25 فبراير، 2009

على حافة الطريق


الف بيت وبيت بيتهـــد

طفل فقير غلبان مش لاقي أي لقمه من أي حـــد

ناس بتاكل

ناس بتشرب

ناس بتلبس

ناس وضعها فوق الحــد

ناس مهمومه وفي حالها

عايشه حياتها في ركن في اي شارع فاضي

تًعب وسهر وإهانه والناس مش واخده بالها

أطفال عايشه ومتهنيـه

وأطفال في الشارع مترميـه

فاهمين وبنتغابى

عايشين وبنتمادي

أطفال في غابة كلها ديـاب

عايشين في دنيا كلها عذاب

سامعين وشايفين والامر ماشي عادي

أنا مالي وإحنا مالنا وهو ماله

لا وزير حس ولا ريس أتكلم ولا قاضي

أتكلموا كتير وقالوا

هنغير هنبني هنزرع لحد ما الامر بقى اقل من العادي

عشره وعشرين وتلاتين قاعدين في بيت الفقر حطم جدرانه

تعبوا واتنهدوا وقالوا يا رحمن يا رحيم يا هادي

وعدهم هيحققلهم ويعملهم لحد ما حدش بقى ياخد بكلامه

وضعهم وحالتهم بيدهوروا ومقدمهمش لا حادي ولا بادي

فقر وغلب وبرد ومحدش بياخد اكتر من مناله

يوم اكل وعشره مفيش والكل لازم يبقى راضي

إنسان مظلوم فقير وبردان خايف على نفسه وخايف حتى من حاله

خايف ليوم يصحى يلاقي نفسو بقى ماضي

هناك 68 تعليقًا:

romansy يقول...

كلنا خايفين اصل نلاقى شبح الماضى لسه بيطاردنا
واننا مش عارفين نعمل شئ لانسان فقير طيب غلبان
وليه سا كتين مش عارف
ليه مش بنتكلم مش عارف
اهو داحالنا ربنا يهدينا

Sweet Violet يقول...

الكل دلوقتى بيقول و انا مالى و خلينى فى حالى

للأسف الانانيه بقت منتشره جداااا فى الزمن ده و ماحدش بقى يبص الا لمصلحته و بس اما غيره مالوش دعوة بيه

ربنا يرحمنا برحمته

تحياتى (:

صدى الصمت يقول...

الله عليكى يامرمر ياقمر وحشتينى ووحشيتنى بوستاتك الجميلة وكلماتك الرائعة
بجد إنتى خرجت من جو الرومانسية وإنتقلتى لقضية مهمة جداً بنشوفها كتير وفعلاً أطفال الشوارع مالهومش ذنب لأنهم إتولدوا نتيجة ذنوب الآخرين ورغم كدة همة لوحدهم ال بيتعاقبوا على الذنوب دى دة بيسبب مشاكل فى المجتمع كبيرة قوى
ربنا يتولاهم برحمتة
سلام يا أحلى ميرو

zainab يقول...

حبيبتى مرمر

أنا بصراحه مش عارفه أقولك ايه و لا عارفه أعبر عن أسفى الشديد و حزنى على هؤلاء الأطفال

كلامك أثر فيا يا مرمر

تحياتى

zainab يقول...

ربنا يسعدك يا مرمر و ويوفقك إلى ما يحب و يرضى

أمين

تجحياتى حبيبتى

hasona يقول...

السلام عليكم

شخـا بيــط مـحـجـوب يقول...

الله عليكى بجد مدونة جميلة والله

تسلم ايدك
كل بيقول و انا مالى و خلينى فى حالى
هذا هو الشعب المصرى

marmar يقول...

romancy :
ساكتين عشان خايفين من اللي حوالينا خايفين من نفسنا ومن اي حد وكل حد
هو ده حالنا وحال الغلابه بس لسه في ناس عندها رجوله وشهامه وتحدي ومبيسكتوش للفقر يحطم كيانهم
تحياتي يا رومانسي




***********************************


Sweet Violet :
لو كلمه انا مالي اتغيرت لكلمه ده مالي ودي حريتي هنتغير كتير اوي وهنعمل حاجات كويسه اكتر لبلدنا ونفسنا ولكل مصري بيحب بلده وبيحب تراب البلد
نورتيني يا جميله

marmar يقول...

صدى الصمت :
شعور بشع لما تلاقي طفل غلبان برئ نايم من جوعه وفقره وناس تانيه نايمه على سرير من ريش مبتفكرش تساعد اي طفل غلبان في الزمن ده
بجد الناس الظالمه كتير دلوقتي
وكله بيقول وانا مالي بغيري وانا مالي بأي حد
ياااااااااه
بجد شعور وحش اوي
وحشتيني انتي اكتر يا سكره التدوين
ووحشني اخبارك وتعليقاتك وميرو الصغنتوته العسوووولة
خلي بالك من نفسك
لا اله الا الله

marmar يقول...

zaineb :
حبيبتي الجميله زوزو ولله كلنا زعلانين بجد على هولاء الاطفال الابرياء اللي اتولدوا لقوا نفسهم كده
ربنا يرحمهم برحمته يارب ويتولاهم
وحشتيني يا زوزو
خلي بالك من نفسك يا جميله




***********************************



hasona :
وعليكم السلام ورحمه الله وبركاته
ازي الصحة يا فندم ؟؟



***********************************



شخابيط محجوب :
الله يسلمك يارب وفعلا الشعب المصري شعب بيتفادى اي حاجة تحصله وبيرفع شعار وانا مالي بس لسه في ناس كويسه وناس بتعرف الخير وبتقدمه على اكمل وجه
تحياتي

اعشق فى الليل ضوء القمر يقول...

إنت عارفه بسأل نفسى دايما هل حقا الطفل أو المرأه أو الرجل الكبير سأسأل عنهم فى يوم لا تنفعنى فيه نفسى وماذا فعلت لهم
أنا كنت بجيب التموين من سساعتين ووجدت رجل كبير وقف بجوارى لا يستطيع الوقوف قادم ليحمل التموين نظرت له وفى نفسى ضيق ملئ على الدنيا حزن
أسيأتى يوم وممكن أن أكون مثله
أحقا عندما أجد طفلا أيمكن فى يوم أن يكون لى طفل مثله
وجدت من فتره بنت فى سن الثانيه عشر بتعرض نفسها لمن يهبوها مسكن وأكل
عارفه أكثر شى محزنى للأن رجل فى سن الستين طلب منى الأكل وتركته ومشيت وعندما را جعت نفسى بحثت عليه فلم أجده إلى الأن أندم على ذلك
أنا طولت لكن موضوع فعلا صعب أحيكى على إختيارك

ريمان يقول...

السلام عليكم

والله كلامك صعب اوى

كل مسئول هيتسأل على الاطفال دى بجد

والحالكم كمان طبعا ربنا هيحاسبه يوم القيامه عليهم

بجد حسبى الله ونعم الوكيل

ghorBty يقول...

كلامك صح جدا

ربنا يرحمنا والله

ودا كله بسبب ان الواحد مش بيفكر غير في نفسه وبس

لو رجعنا لتعاليم ديننا ما كناش نشوف اللي بيحصل دا

تعرفي انا بزعل جدا لما بلاقي منظر الشحاتين هنا وهناك

فين مهفوم التكافل في الاسلام وفين دور المساجد

والله ربنا يرحمنا

ربنا يبارك لك يا مرمر

دمت بخير وسعاده

غربتي

عاشقه الرومانسيه يقول...

انسب رد هو كلام صلاح جاهين
وكان لسان حالهم بيقول

مرغم عليك ياصبح مغصوب ياليل
لا دخلتها برجليا ولا كان لى ميل
شايلنى شيل دخلت انا فى الحياه
وبكره هخرج منها شايلنى شيل
عجبى!!!

انتى تأمرى تعيشى وتمسحى واعيش واكتب ههههههههههههههههههه

marmar يقول...

أعشق في الليل ضوء القمر :
أكيد يا اعشق هنتسأل عن كل حد مر علينا شوفناه او حسيناه وعرفنا ضعفه ومحاولناش نساعده ولو بكلمه واحده
وموقف البنت دي مليان جدا مش بس في مصر لا في دول عربيه ناميه كتيره جدا الفقر ممكن يؤدي الى ابشع الطرق اللي اي حد ممكن يتخيلها بجد
وكفايه انك راجعت نفسك وعرفت انك غلط ومحاولتش تساعده ولو بجنيه واحد
بس متنساش حاجة مهمه اوي
ربنا غفور رحيم يعلم ما بالقلوب
وعارف انك كنت ناوي تساعده بس الشيطان لعب في دماغك وخلاك تبتعد عن فعل الخير وقربك من فعل الاخطاء
وربنا هيغفرلك لانك كنت ناوي وندمت وراجعت نفسك كويس قبل فوات الاوان
في ناس لسه ماشيه في طريق الغلط ومبتحاولش تتعب نفسها وتفكر في التوبة الى الله
يارب يهدينا ويرحمنا اللهم امين يا الله
تحياتي ليك يا اعشق

marmar يقول...

ريمان :
وعليكم السلام ورحمه الله وبركاته
ياريت لو جت على اد الحاكم وبس دي جت علينا وعلى نفسنا كبشر اننا مبنحاولش نغير اللي بيحصل بأي موقف معاهم كمساعده ماليه ونفسيه
يااااه بجد يا ريمي لما تفكري في الموضوع بقلبك مش بعقلك
بتحسي قلبك بيوجعك بجد من مناظرهم وفقرهم وغلبهم وضعفهم
ربنا يرحمنا ويرحمهم يارب

بعيدا عن كل ده
أعذريني في تقصيري معاكي في عدم الرد على البوست بتاعك بس انا مبعرفش ارد في الحاجات دي خالص
وبعدين مش احنا اتفقنا وندمنا على اننا مش هنكتب كده تاني ؟؟
ايه حكايتك يا بنتي بس
ربنا يهديكي يا ريمان
عشان مخك شكلو هيدوينا ورا الشمس
نورتيني يا بت

marmar يقول...

ghorbty :
يا غربتي مبقاش في تكافل بنا وبين بعضنا زي زمان ايام ما كان كل الناس بتحب الخير لبعضها وتسعى لتقديم الخير .. دلوقتي بقى محدش بيعمل حاجة ولو عمل هتبقى حاجة بعيده عن اي مبادئ انسانيه والكل بقى يقول وانا مالي خليني في حالي
اهو بالكلمتين دول هيبقى حالنا اصعب وانيل ولله .. ياريت نحاول نعمل خطوه لقدام مش نرجع الف خطوة لورا..

على فكره
مش عارفه مدونتك مالها
البوست الجديد مفهوش تعليقات ؟؟
والبوست اللي قبله عملتليه اعاده نشر ولا ايه؟؟
مش فاهمه حاجة ولله
معرفتش ارد على البوست الجديد خالص..
دمتي بكل خير

marmar يقول...

عاشقه الرومانسيه :
بطلي تسيحيلي بقى الله
الله
الله
ايه ده بقى
هههههههههههههههههههه
تعباكي معايا يابت دنا خدتهولك كابي وبيست يعني راحه خمس نجوم
فين الحساب بقى؟؟

elsha3er يقول...

جميل الكلمات والاحساس والاخص انه بيناقش احوال الناس

تحياتى


احمد الشاعر

Bent el-Qassam يقول...

مين مستعد يساعد غزة ؟؟؟؟؟؟؟؟ ياشباب الاسلام محتاجيييين متطوعين بالله عليكم ساعدو غزةلتبقي رمزا للعزة
الى مستعد يساعدنا يضيف الميل ده bent_elqassam2000@yahoo.com وهنا تجدون كافه التفاصيل عن الحمله http://gazawillnotdie.blogspot.com/2009/02/blog-post.html

الازهرى يقول...

إنسان مظلوم فقير وبردان خايف على نفسه وخايف حتى من حاله

الخوف بينتشر مع انتشار الظلم لانه المرادف لعدم الامان

وفعلا الناس بقت اسوأ
يمكن فى ظروف
لكن زمان وبحكم التاريخ كان فى ظوف اسوأ من كده وبرضه الناس كانت بتراعى بعض
لكن فى حاجة غلط فى الزمن ده
هى ايه مش عارف ؟
لكن بحاول اعرف

elsha3er يقول...

السلام عليكم

ازيك يا مرمر عاملة اية بصى ياستى احنا دلوقتى اخوات يعنى اى اختلاف حول الاراء لا يفسد اخوتنا بصى يا ستى بالنسبة لعبد الناصر انا اتمنى اكون غلطان بس هو مش الرئيس اللى يستحق كل التبجيل دة لية عبد الناصر راجل وصولى من الدرجة الاولى دليل ان عبد الناصر كان فى اول الامر تبع الاخوان المسلمين وعندما ايقن انها لن تحقق اهدافه تركهم كل هذا لايعيبه ولكن عندما تولى الرئاسة ارتكب فيهم ابشع الجرائم من قتل وتعذيب واعتقال ووالله فى واحد كبير حكالى موقف والله يندى له الجبين كانو بيدخلو على المعتقلين الكلاب الصعرانة وبيحكى لى انه والله كان الكلب بيخرج والعضو التناسلى فى فم الكلب هل بهذا رجل يحترم
عند وصول ناصر الحكم عمل على فرض السلطة فى نفسه ومحاولة اطاحة نجيب

اما حربيا وسياسيا فهو رجل فاشل فى كل المقايس هزائم رهيبة امام العدو خيانات فى عهده وتسريب خطط ومطارات الجيش السرية هل يعقل ان رئيس يستعد للحرب وحشد الجيوش ان يقوم بخطاب للعالم ويقول نحن مستعدين اتم الاستعداد للحرب ولكن سنجعل لهم الضربة الاولى
كتاب القضية الفلسطينية د/محسن صالح

هل يعقل فى حرب ان تقال هذة الجملة هذا يدل على الغباء السياسى بمجريات الامور وكانت الضربة الاولى لهم نهاية لنا

اما عن الاصلاحات الداخلية زى القوانين وكدة دة شىء طبيعى لازم يعمله وعلى فكرة لم تطبق هذة القوانين بحذافيرها

انا لم احسب له فى حسناته سوى تأميم القناة والذى فشل بعد ذالك فى حماية قراره عسكريا لولا تدخل الشعب متمثلة فى المقاومة الشعبية

لية الناس مان كانو بيحبو ناصر

عشان كانت الناس تعبانه مستنية التغير اللى اتمثل فى ناصر فا كان بنسبة لهم احسن من الاول بكل الطرق

عشان كدة بيحبوا ناصر زى ما الناس بتحب غاندى وسعد زغلول وهم اصلا اتنين ربنا ينتقم منهم

فا ناصر ابتدى يغير مفهوم الشعب حول الاشتراكية الروسية وتطورها الى الاشتراكية العربية والاحنحياز الى المعسكر الشرقى كل دة طبعا كان له عواقب كبيرة وومكن اقولك عن كتاب تقدرى تعرفى منه كل دة هو بس صعب انك تلاقيه لانه ممنوع انا جبته بأعجوبة
اسمه الاشتراكية الشيوعية الديمقراطية
وموضح الكتاب دة ان مصر احدى الدول التى نفذت هذا المشروع فى عهد ناصر باستثناء الشيوعية مما دعم المعسكر الشرقى حتلاقى دة فى الجزء المخصص من الدول الاشتراكية ومؤلف الكتاب د/ج.ه.كول

دة اللى عندى لو فى حاجة تغير فكرتى عن ناصر انا مستعد بس تكون مقنعة

تحياتى

احمد الشاعر

marmar يقول...

هقولك حاجة
انت مقتنع بأن ده عبد الناصر بكل اللي اتحكالك بالظبط لانك بتسمع من طرف واحد ويا عالم كلامه يا صح يا الاغلب غلط
لو عبد الناصر مش كويس برأيك
كان ايه اللي هيجبروا انه يشترك في حرب فلسطين سنه 48 كظابط في الجيش المصري ضد المستعمري الصهاينه
ده كفايه الخطوة اللي اتخذها عبد الناصر ومحدش زعيم عربي غيرو خدها لما اتهزموا العرب وقامت دوله اسرائيل وقامت ثورة يوليو 52 بأمر من عبد الناصر لكل القوات المصريه
وتسريب المعلومات اللي بتتكلم عليها كلام غير منطقي
هل يعقل زعيم سياسي مصري هيسرب ملعومات بلده لصالح اي طرف اخر؟؟
ده عمل مجموعه سريه من الظباط في الجيش المصري سماها "الظباط الاحرار"
يكفي موقفه اتجاه بريطانيا وفرنسا والكيان الصهيوني لما عرفوا بتأميمه لقناه السويس وعلى الفور اتجه عبد الناصر لمجموعه من الظباط الجيش المصري انسحبت كل القوات الاسرائيليه والفرنسيه والبريطانيه سنه 56
يكفي حبه لكل الشعوب العربيه ومحاولا مساعدتها بأي الطرق وموقفه البطولي في الوحده العربيه مع سوريا لما اعلن عن اتحاد مصر وسوريا وسماه الجمهوريه العربيه المتحده ..
تقدر تجبلي اي زعيم عربي عرف يعمل ربع اللي عملوا عبد الناصر؟؟
ولو انت شايف انه معملش حاجة اسأل اي انسان حارب وعاش الدور البطولي ايام عبد الناصر وهتعرف كل كلامي انه مظبوط وميه في الميه
الحمدلله والدي حارب في 73 وطيار حربي
وبيحكيلي بالتفصيل عن كل حاجة
جمال عبد الناصر بيحلفو بيه المثل في الدور البطولي والشهامه وانتماؤه للوطن العربي .. والدور البطولي اللي اتخذه ضد الرئيس اليوغسلافي تيتو والاندونيسي والهندي بتأسيسه منظمه عدم الانحياز لأي منهم واي قرارات تصدر منهم ..
وزياده الانتاجات الزراعيه والصناعيه والاقتصاديه في عهده
أظن ان ربع الكلام ده يكفي لنفخر بزعيمنا ورافع رايتنا عبد الناصر






كانت الصرخة القويــــــــــــة بالميدان في الإســـــــــــكندرية
صرخــة أطلقهـا جمــــــــــــال إحنا أممنــا القنـــــــــال
انتصــــــــــــــــرنا .. انتصـــــــــــــــــرنا
ضربـة كانـت مـن معلـــــــــم خلا الاستعمـــار يســـــــــلـم
جاب سلاحه، وطياراته.. وغواصاته.. ودباباته واعتدى علشان نسلم
هو ميــــن لا ده وبعـــده ، هو إللي اتلقى وعـــــــده
كنا نار أكلت جيوشــــــــهم نار تقول هل من مزيــــــــــــد
انتصرنا ولسه عارهـــــــــــم ذكرى ف تراب بورســــــــعيد

marmar يقول...

الازهري:
عذرا لأزهري باشا على عدم الرد على التعليق بتاعه بس المناقشه اخدتني للدفاع عن دوري البطولي اتجاه حبيبنا وزعيمنا القائد جمال عبد الناصر ..


زمان كان فيه محبه شديده بين الناس والفه وتعاون ومحدش كان بيشوف حد محتاج الا لما يساعدو دلوقتي العكس تماما بيحصل كل حاجة بتحصل بقت وحشه معدش في خير بقينا نشوف الناس بعين واحده وياريتها عين الحب والخير لا عين الظلم والبشاعه
الغلط اللي مش عارفو يا ازهري هو مننا احنا الغلط في نفسنا وشخصيتنا
لو قدرنا نصلح نفسنا ونبطل وانا مالي هتبقى الحياه تمام بجد
تحياتي ليك وعذرا مره أخرى

marmar يقول...

بنت القسام:
كلنا نفسنا نساعد غزة وشعبها مش انتي بس ولله
بس ياريت نعرف ازاي نساعدهم وهل المساعده دي بجد هتفيدهم ولا؟؟






**********************************

الشاعر مره أخرى :
رأيك على عينا يا شاعر
وتسلم على تعليقك الجميل في حق البوست المتواضع ده
دمت بخير

بـسـمـــة صـــــلاح يقول...

والله يامرمر قطعتي قلبي
كلماتك منتهى الجمال
جميله بجد
اقولك ايه مش عارفه والله
بس ربنا يعين محدش ضامن نفسه هو كمان

وحستي الذئبه الكبننه اويات كتييييير
هبقى اضيفك بقى عشان نرغي نرغي نرغي وابقى اخليكي تشوفيني بقى عشان تتهبلي من جمالي
ههههههههههههههههههه
يلا يابت سلملم

ahmed_k يقول...

اللهة ينور عليكي يا ريم
هما بالفعل أصبحوا ماضي
ولكن أيمكن أن يعود الماضي للحاضر
طول ما حاميها حراميها مظنش,
أحنا مشكلت بلدنا أن الكل بينظر لمصالحه الشخصيه وما الذي سيلحق يسرقه خلال فترة بقائه في منصبه
والمشكله أن ثقافة السرقه والرشوه أصبحت عامه
من الكناس في الشارع للموظف في مكتبه
والعسكري في الإشاره والظابط في المكتب
الصوره قاتمه
بس نرجع ونقول
إذا كان رب البيت بالدف ضارب فشيمة اهل البيت الرقص
فالناس على دين ملوكهم أن اجادوا أجادوا وإن أساؤا أساؤا
فطبيعي بلد تسرق من كل ناحيه ستجدي من لا يملك وسيلة للسرقه مش لاقي ياكل
ولا حول ولا قوة إلا بالله
مش معنى كده ان بلدنا سيئه اوي
بس للأسف السيئ أصبح ظاهر وواضح جدا

نسأل الله أن يكشف عنا الإبتلاء

موضوع جميل كعادتك يا ريم
ويدل على حمل هم الوطن وهو الواجب على كل المواطنين الشرفاء حتى يعم الشرف والخير ربوع بلادنا

خالص وأطيب مودتي وتحياتي

dramaqueen يقول...

معاكى حق يا مرمر
كله بيقول وانا مالى

ربنا يقدرنا ونقدر نساعد الناس دول لانهم بجد محتاجين لنا
واحنا كمان محتاجين يكون عندنا ثقة باننا هنقدر نغير حاجة للاحسن بس لازم نبتدى مش نقف فى مكاننا
نستنى غيرنا يتحرك

تحياتى ليكى على مشاعرك وانسانيتك

marmar يقول...

بسمة صلاح :
شكلي هتهبل منك واعمل هاك على مدونتك واقفلهالك عشان اخلص منك ومن لسااااانك ده
ايه يا بت مبتزهقيش من الرغي يخربيتك بت عسسسسسسل صحيح
ولله يا بوسي الوضع بقى فعلا صعب يمكن انتي عشان متغربه برا مصر زيي فمش حسا اوي بالمعاناه اللي بنشوفها في الشارع المصري لما بنلاقي كوم من الاطفال لا يرتدون سوى ثياب باليه وحالهم يكاد يشبه حكايات الخيال من صعوبتها .. بجد حاجة تقطع القلب نفسي اساعدهم ولو بكلمه واحده بجد
ربنا يصبرهم ويرحمهم ياااارب
نورتيني يا ذئبه الكبننة

marmar يقول...

ahmed_ k:
المشكله يا احمد ان حال البلد بيتدهور كل يوم عن الاخر وده شئ مأثر فيا اوي بما اني مصريه واعتز بكوني مصريه ولكن ما لا اعتز به هو السرقه التي تحدثت عنها في تعليقك
بقى الكل بيحاول يسرق وبيتسابقو عل اللي مين هيسرق اكتر في وقت اقل
في حد يسرق من وطنه وأمه ؟؟
متهيألي عمري ما شفت كده بجد
لو كل مواطن مصري قام بدوره البطولي اتجاه مصر وحماها من شر السرقه ومن شر الفساد اللي بيحصل في بلده هتبقى احلى واحسن بلد بجد ..
لما اطفال ابرياء اتولدوا لقوا نفسهم في الشارع ايه ذنبهم بجد ؟؟
الذنب لا ذنبهم ولا ذنب اهلهم اللي معرفوش يوصلولهم الحمايه , الذنب ذنب بلدهم اللي وصلت اهالي للحال ده ذنبهم ان هما شرفا وعرفوش يسرقوا زي كتيييييير من الناس التانيه
ياااااه بقى الشرف والاخلاص وحمايه البلد بيوصل لكده ؟؟
شعور بشع بجد لو حد حسوا واتخيلو
ربنا يرحمهم من فقرهم وجهلهم وحالهم
ويرحمنا ويصبرنا على حال بلدنا يارب
انت اللي نورتني يا احمد بجد ورأيك وتعليقك من اهم التعليقات اللي بستفيد منها كونك رجل مصري مخلص لبلدك وأمتك ..
بارك الله فيك يا احمد
نورتني بردك ووجودك الجميل
دمت في حفظ الرحمن

marmar يقول...

dramaqueen :
ياريت بجد نعرف نقف ازاي نقف وقفه بجد تكون خير وسلام وامن لكل بلدنا نعرف ازاي نحمي غيرنا قبل ما نحمي نفسنا . نعرف ازاي نحمي الاطفال المشردين دول من فقرهم قبل ما نحمي اطفالنا .. لان اللي بيدور على مصلحته وبس ممكن يجي اليوم واللي يصبح فيه مكان اي طفل من دول .
تحياتي ليك ولزيارتك الجديده للمدونه.

elsha3er يقول...

انا بس عايز اعرف مين اللى خد دباباته وطياراته وغوصاته دة عبد الناصر اللى كانت جيوشه بتنضرب على الارض بسبب خيانة قوادة ودة كلام قائد من الجيش فى برنامج شاهد على العصر دة كلامهم هم

ولا حرب 56 التى لم ينجا منها عبد الناصر لولا تدخل المقاومة الشعبية اما عن حرب 48 دة كان لازم يروح يحارب زيى الاف زيه دة امر عسكرى وبعدين ما السادات حارب معاة اية المشكله يعنى هو كل من حارب فى 48 بطل ما الاخوان حاربوا وعبد الناصر عمل فيهم اللى ما بيتعملش ودة من واقع كتاب الاخوان شبهات وردود

لاحظى ان انا بجبلك كتب موثقة مصرية وعالمية بيتكلمو عن فشل ناصر سياسيا وحربيا واقتصاديا

انتى لو تريحينى وتقوليلى لية ناصر ماكسبش حرب طول حياته
لية ناصر اعتقل الاخوان وعذبهم
لية الاشتراكية الروسية والمعسكر الشرقى كان فى نظم اقتصادية افضل

لو جاوبتينى على الاسئلة من واقع كتب ومؤرخين يقنعوا انا حغير وجهة نظرى

ولو ماعرفتيش تستدلى على اجابات من كتب اعرفى ان عبد الناصر اعطيناه اكثر من حقه

مرمر برجع افكرك احنا بعد كل دة اخوات عشان ماتزعليش ولا حاجة دى وجهات نظر ولكل فرد حرية الاختيار

تحياتى

احمد الشاعر

marmar يقول...

اللي خد دباباته وطياراته وغواصاته ده كلام عبد الحليم وكلام كل الشعب المصري اتجاه اعظم زعيم سياسي في الدنيا جمال عبد الناصر
لو هو برأيك زعيم جبان زي ما انت مش عارف وبتوصفو بناء على كلام بعض الاشخاص اللي معرفوش ياخدوا لا حق ولا باطل في عهدو مكنش ايام حرب 56
كل القوات االاسرائيليه تنسحب من مصر والبريطانيه والفرنسيه ده يدل على شجاعتو وشهامته للشعب المصري اللي مكنش اي زعيم عربي وقتها خد خطوة واتحرك وعمل حاجة غير جمال عبد الناصر . انت بتطلب مني أجبلك كتب ومستندات انا قلبي وعقلي وعقل كل المصريين وغير المصريين يعرفو ان كلامي صح ومش محتاج لا لمستند ولا لدليل ولو عايز اي كتاب انا ممكن اجبلك مستندات رسميه صوت وصوره لو تحب .. بس انت مقتنع لكلامك لانو ينص على اراء اخرين مش على ناس يعرفوا عبد الناصر وحبوه وعاشو في عهدو مبسوطين .. ده رأيك وانت اللي حر فيه وبأقتناعك بكلام انت نفسك شاكك فيه.

elsha3er يقول...

لا انا مش شاكك فى كلامى لاكن احتمال الخطأ عند اى انسان وارد انتى نفسك ممكن تكونى غلطانة احنا مش انبياء اما بالنسبة لناصر هو شجاع مش جبان لكن متهور ما عندوش عمق سياسى اما عن الانسحاب فا دة كان ضرورى زى ما قلتلك لان احنا اصبحنا من المعسكر الشرقى فكان روسيا لازم تهدد وبعدين كان لروسيا مصلحة فى انسحاب اسرائيل وقوات العدوان بالاضافة الى خوف امريكا من استعادة بريطانيا لنفوزها مرة اخرى فى مصر مما ادى الى تدخل امريكا بالضغط على كل من بريطانيا وفرنسا يعنى كانت ظروف الانسحاب معظمها خارجى وليس لبسالة عبد الناصر ودة كان فى كتاب

العلاقات المصرية الامريكية فى القرن19 وال20 لدكتورة /عفاف العبد

انا ما بكلمش الا من واقع كتابات المؤرخين

وعلى فكرة انتى بتهربى بشياكة من الاسئلة وانا عن نفسى ليا كتب المؤرخين والناس اللى شاهدة على العصر

اللى كان فيهم احد قواد ناصر وقال كان فيه خيانة داخل الجيش المصرى مما ادى للنكسة وممكن تشوفيها على اليو تيوب فى برنامج شاهد على العصر

وهو دة واحد من ابناء الشعب وقواده وعاصر فترة ناصر

تحياتى


احمد الشاعر

marmar يقول...

elsh3er :

روسيا مكانش ليها أي دخل في انسحاب القوات الاسرائيليه في مصر ولو حضرتك قاري تاريخ مصر كويس كنت هتعرف ان موشيه ديان هو اللي طلب من الكيان الاسرائيلي الانسحاب خوفا من جبروت عبد الناصر وبعد 67 طلب من عبد الناصر وبعتله برقيه فيها معاهده سلام ما بين الطرفين ايضا خوفا من عبد الناصر وده اللي عمروا ما وافق عليه وقطع البرقيه ورفض المعاهده الفاشله دي ..
والناس اللي بتتكلم عليهم من جماعه اخوان دول هما اتعمل فيهم كده عشان اسباب معروفه جدا بسبب محاولتهم لاغتيال الريس في الوقت اللي كان مش عاجبهم قانون الاصلاح الزراعي اللي عملو الي كان بيخدم الفلاح المصري لامتلاكه الارض الزراعيه في الوقت ده قاموا بالعديد من محاولات القتل للزعيم واتعمل فيهم اللي اتحكالك وحكيتوا ..
كفايه ان في الوقت ده اللي كان لا يتجاوز معدلات النمو في دول العالم التالت نسبه لا تزيد عن اتنين ونص في الميه وكان الاقتصاد الوطني نسبتوا اكتر من سته وستين في الميه للقطاع الخاص المصري
انا مش بهرب بس انت اللي بتحاول تتكلم عن حد معرفتهوش اد ما والدي عرفوا وعاشرو وعاشر عهدوا وحكالي ياريت متعتمدش على كلامك على ناس متعرفش مين هو عبد الناصر .. لانه اكبر من ان حد يجيب اسموا بطريقه مش تمام
تحياتي

كيــــــــــــارا يقول...

دا اغلب الناس دا بيغنو الانانيه كمان

ربنا يرحمنا

رابطة مدونون من أجل فلسطين يقول...

نتشرف بدعوتكم للانضمام الينا

وقراءة الدور الفعلى لكلا من اعضاء الرابطة

ان كنت جاد وتريد مساعدة اخوانك فى فلسطين

واشتركت معنا من كل قلبك

ادخل وخبرنا فيما انت ستعمل معنا

http://bloggersforpalestine.blogspot.com/

elsha3er يقول...

مرمر فى اية احنا بنتناقش مش بنتعارك
انا حاسس ان ممكن حبة وتشتمينى خلى النقاش دايما على نار هادية اعرضى وجهة نظرك من غير تعصب وضعى احتمال للأخطاء

اما بقى عن ان روسيا ما لهاش دخل لا طبعا انا كل الكتب اللى قرأتها حتى كتاب هيكل اقرب المقربين لعبد الناصر قال فى الكتاب بالنص نحن استطعنا هزيمة اسرائيل سياسيا بأستمالة روسيا للقضية اعتقد ان بعد كلام هيكل مافيش كلام لان دة واحد كان من اقرب المقربين لناصر اما عن اللى حكاه والدك على عينى وراسى بس فى ناس بتبص للقضية من منظور واحد ممكن يكون بيحب ناصر اوى فشايفه ان كان كل اللى بيعمله صح

اما بالنسبة للأخوان لا طبعا ما حصلش منهم الكلام دة خالص مافيش كتاب واحد نص على كدة اما الناس اللى باخد منهم معلومات فكلهم دكاترة ومؤرخين كبار ومنهم من شهد على العصر

المهم والافضل ان احنا ننهى النقاش لان انتى مش عايزة تقتنعى الا للى فى دماغك وانا مالقتش عندك اللى يغير وجهة نظرى

فيبقى الوضع كما هو عليه

بس المهم انك ماتزعليش من المناقشة لان حاسس انك متضايقة منى اوى

وفقك الله


احمد الشاعر

marmar يقول...

انا حسا اني بتكلم في الشرق وانت بترد عليا في اقصى الغرب
انا لا متعصبه ولا مضايقه اطلاقا لان لا كلامك ولا كلام التمانين مليون ده لو بحكم انهم كلمهم معاك في الرأي هيأثر فيا ولو فتفوته ..
بس هقولك ايه في واحد مقتنع بكلام نصي وكلام صحافه صفرا مش كلام انساني وحقيقي الف مليون في الميه .. ما علينا
المهم انت بتتكلم عل اخوان وكأنهم ناس فكرهم ومعتقداتهم كويسه وواقف معاهم أظن ده كفايه انك فعلا تقف ضد الزعيم عبد الناصر بس لو كنت قريت كتاب "ايام من حياتي " للدكتوره زينب الغزالي .. وهيا بتحكي فيه عن تعارفها بالقيادي الاخواني الشيخ عبد الفتاح اسماعيل سنه 57 لما كانوا شنوا حمله اغتيال على عبد الناصر وبعد كده ايام السادات ولما اعتقلوه عرف الفرق الحقيقي بين الزعيمين وقرر انه يكتب كل اللي حصل ورواه تفصيليا لو ده هيقنعك انا ممكن ابعتلك نسخه من الكتاب عسى انه يغير رأيك بس مظنش بردو ..
والاختلاف في الراي لا يفسد للود قضيه وانت اللي شكلك متعصب اوي ومضايق
معلش
كل اللي قبلك وكانوا بيقولو نفس كلامك كانوا بيمروا بنفس الحاله دي.
تحياتي

Soul.o0o.Whisper يقول...

مرمرتى

أولا آسفة على التأخير
كان غصب عنى يا قمر

ثانيا بوست صعب أوى بجد
فعلا كل واحد بينهش فى التانى
كل واحد شايف نفسه المظلوم و محتاج
و مش شايف غيره

ولو نبص حوالينا نلاقى مآسى ياما
بس نحس ببعض

للاسف مات الاحساس جوانا
و بئينا نهون على بعض

ربنا يرحمنا يارب
و يلين قلوبنا اللى بئت زى الحجر دى



و يصلح حالنا جميعا






دمتى بود يا قمرى

marmar يقول...

كيـــــارا :
بس مش كلهم صدقيني يا كيارا في منهم ناس بترفض اي سرقه واي ظلم بيحصل في بلدها ولله .. ربنا يرحمنا بجد
نورتيني






**********************************


رابطه مدونينين من أجل فلسطين :
أن شاء الله تلاقي طلبكم قريبا بأذن الله

marmar يقول...

Soul.o0o.Whisper :
المشكله في البلد ولا المشكله في حد المشكله في نفسنا احنا
احنا اللي بنرفض نتغير عشان غيرنا
بنرفض نعمل حاجة صح ولو مره واحده في حياتنا
بنرفض حاجات كتيييييره اوي
وبنروح للسرقه والظلم والانانيه والجشع .. زي ما قلتي الناس بقت تنهش في بعضها وفي نفسها وبقينا كلنا نقول وانا مالي خليني في حالي
بس يا ترى لو خلينا كلنا في حالنا في حاجة هتتغير ؟؟
مظنش بجد ان حاجة هتتغير للاحسن لو كلنا قلنا وانا مالي بأي حد..
تحياتي ليكي يا جميله
واتأخري براحتك وانا مقدره ظروفك
دمتي بخير

fashkool يقول...

عارفه يا مرمر .. الولاد دول زنبهم انهم مصريين
اصل يا مرمر مصر هى اللى بتظلم اهلها بالرغم من انهم بيحبوها .. لو عددت لك احداث التاريخ حتلاقى كلامى مظبوط
ناس بيغرقوا فى البحر بفعل فاعل
وناس بتغرق فى البحر هروبا من ظلم بلدهم
وناس بتتحرق فى القطارات ولحد الوقت مش عارفين ليه وقالوا لنا وابور جاز وقالوا وابور غاز والموضوع مش كدا خالص

وناس نايمه تحت الكبارى ومالهمش حته تقيهم رطوبة وهواء الشتاء

وناس فى مارينا ............... وما ادراك ما مارينا

وناس فى شرم عشان بلدنا اتشرمت من كتر الظلم اللى فيها

وناس مش لاقيين لقمه ولا غمسه ولا شربه

وناس وناس وناس ...

وناس من الهم بتقول سلامو عليكم بقى عشان هى حتخرف وحتتهبل وتهلفط بكلام فاضى .. سلام

fashkool يقول...

العزيزه مرمر .. تحياتى
بالنسبه لكلام الشاعر فانا انحاز اليه جدا وقد قرأت تعليقك وتعليق مواطن مصرى نايم والذى يدافع فيه عن عبد الناصر من كتاب لسامى شرف وسامى شرف على فكره زوج بنت عبد الناصر وكلامه عن عبد الناصر مجروح .. وكمان قريت عن الاخوان المسلمين وانا مع مواطن مصرى فى رأيه عن الاخوان المسلمين وهم على فكره اكثر انتهازيه .. هذا لا يهمنا ولكن ما يهمنى ان اوضح لك عن عبد الناصر
اختلف مع الشاعر فى بند واحد فقط وهو تأميم قناة السويس .. ليه ؟ عشان امتياز قناة السويس كان يخلص بعد حوالى عشر سنين او اكثر قليلا .. تصورى ان تخوض بلدا حرب شرسه عشان عشر سنين او زياده شويه .. كانت قناة السويس حترجع حترجع من غير حرب يعنى عبد الناصر من وجهة نظرى مخطأ ايضا فى تأميم قناة السويس .. اما قيامه بالثوره واللى وجعوا بيها دماغنا وغسلوها كمان كانت غلط فى غلط .. سمكن تستغربى للكلام ده .. كانت البلد قبل الثوره فهيا حياة دميقراطيه وحياةسياسيى .. وكان الزمن فى هذه الايام كدا .. ايه اللى حصل بعد الثوره .. عبد الناصر وضع نظام للحكم سارى حتى يومنا هذا وهو ما نعانيه اليوم نتيجه لهذه السياسات ونظم الحكم التى وضعها عبد الناصر والقمع البوليسى والاستفتاءات المزوره التى تأتى علينا بمن لا نريده ويريدوه هم.
نحن يا مرمر مسحوا عقولنا وبنوا لنا ثقافة من عام 52 حتى الأن على مزاجهم والمشكلة ان ثقافة 60 سنه مترسبه فى عقولنا وامخاخنا وسيأتى اليوم الذى يستكشف فيه هذا الوطن الجريمه الكبرى التى صنعها عبد الناصر لهذا الوطن وجريمة حكم العسكر لان العسكر لا يصلحون الا للعسكريه اما السياسه فلها اصحابها
ميزه عبد الناصر الوحيده والتى لا استطيع ان انكرها ولا ينكرها احد انه كان فعلا وضنيا ويحب بلده جدا ولكنه كان كالدبه التى قذفت صاحبها بالحجر فقتلته
لا تصدمى يا مرمر .. فهذا الرأى موجود عند كثير من المصريين .. ولكنهم يأثرون السلامه ولا يتكلمون لان هناك كثير من الاشياء المغلوطه والتى نتكلم عنها بالعاظفه ولا نتكلم عنها بالعقل.
حاكمل فى رد ثانى على طول

fashkool يقول...

وتعليق اخر للتعليق على تعليقك
ما اجبر عبد الناصر للذهاب الى حرب فلسطين كونه عسكريا ولا يستطيع مخالفة الاوامر العسكريه .. يعنى ذهب بالامر
اما تسريب المعلومات فكان هو بعناده الذى يفصح عن نواياه
وموضوع الضباط الاحرار مازالوا هم انفسهم مختلفون فيه فهل هو من انشأه ام السادات ام يوسف صديق والذى كان له اليد العليا ليلة القيام بالثوره ولم نسمع عنه بعد ذلك .. هذا الموضوع ما زال خلافيا حتى الان. ونحن فى حاجه الى اعادة تأريخ للثوره .
اما من ناحية حرب السويس فان النصر الذى حصلنا عليه كان نصرا سياسيا وليس عسكريا وهذا امر معروف للكافه ولولا الموقف الامريكى والانذار الروسى .
وبالنسبه لحبه لجميع الشعوب العربيه فهو كان بيعمل مجد شخصى له
اماالصرخه القويه فى الميدان فى اسكندريه ..........
يا بنتى .. كان عبد الناصر يخاطب عاطفة الشعوب ولا يخاطب عقلها وحتى الان تخاطب الشعوب بنفس الاسلوب .. حتى القذافى تلميذ عبد الناصر ماذا فعل بليبيا وفى الليبين ... ركب على انفاس ابوهم وبيعمل ابنه وليا للعرش وباع لهم الوهم ولولا اكتشاف البترول فى ليبيا لكانت قعدت قدام الحسين وقالت لله يا محسنين زينا بالضبط .. عارف ان انا اديتك صدمه .. ما علهش ... يوم ورا يوم تنكشف الحقائق .. وبدأت وبدأ كثير من الناس يتحدث ويقول رأيه ..
ايدى تعبت من الكيبورد .. تحياتى بقى

fashkool يقول...

يامرمر هو مش بيحب موشى ديان عن عبد الناصر .. لكن ممكن يكون بيحترم فيه العسكريه وشخصيته .. مش ضرورى عشان نكره واحد اننا ما نحترموش ..

حاقول لك على حاجه غريبه .. ايام الانتخابات الاسرائيليه من كام يوم كدا كنت قاعد متابع اخبارها فى التليفزيون بمنتهى الاعجاب ونفسى نكون زيهم هما باحترامهم لبعضهم عشان كدا مش قادرين عليهم .. دوله كل عمرها حوالى 60 سنه عامله فينا كل للى هما عايزينه لانهم بيشتغلوامع بعض صح صح
تحياتى

elsha3er يقول...

fashkool استاذى العديد كل ما ذكرته فى تعليقاتك هنا هو ما كان فى صدرى يعنى انا ما بكرهش عبد الناصر بل بالعكس بحبه كرجل مصرى ووطنى بشدة ولكنه اخذ اكتر من حقه اما بالنسبة لموشى ديان طبعا زيى ما انت قولت بالظبط

تحياتى لكى يامرمر

تحياتى للأستاذ


احمد الشاعر

marmar يقول...

fashkool :
اي زعيم واي انسان واي قائد له محاسن وله سيئات بس عبد الناصر لا يختلف اثنان على الشخصيه والروح الوطني وقوته ودميقراطيته التي كان يمتلكها بحيث لم يستطع اي رئيس دوله عربيه في ذلك الوقت ان يقف امامه , لدرجة ان رئيس دوله عربيه اقليميه وهي سوريا رضي ان يتازل له عن الحكم وينضوي تحت لواءه تحت مسمى الوحده العربيه بسبب روحه وشخصيته اللي كان حسوا في البلد لحد دلوقتي والتاريخ يشهد على ذلك بالصوت والصورة
سر عبد الناصر هو انه كان يخاطب ضمير الشعب العربي ..لقد كان الجميع يسمعون في خطاب عبد الناصر ما كانت تحدثهم به انفسهم ...ومنه استمد عبد الناصر شعبيته وحب الكل اليه ..
منذ ان غابت فتره جمال عبد الناصر يا عمي فشكول فنحن من اسوأ ل اسوأ يكفي انو هو من قضي على الملكيه الفاسده وحولها لجمهوريه عظيمة ..
ولما لاحظ بضرورة إنشاء سد للحفاظ على المياه والاستفادة منها فى إنتاج الكهرباء والرى وحماية مصر من خطر الفيضان والجفاف
واتجه ناصر إلى أمريكا يطلب مساعداتها لقوتها ونفوذها وأرادت أمريكا استغلال الموقف وفرض إرادتها على مصر وإملاء شروطها .

ورفض عبد الناصر فرض الإرادة الأمريكية على مصر واتجه إلى البنك الدولى يطلب معاونته ولكن البنك الدولى وبأوامر من أمريكا رفض معاونة مصر

وقبل ناصر التحدى الأمريكي

ووقف التاريخ ليسجل بحروف من نور قرار مصر بتأميم قناة السويس . واستردت مصر قناتها لتستفيد من دخلها فى بناء السد العالى .

وكانت هذه ثانى إشارة حمراء تضئ فى أمريكا والعواصم الغربية بخصوص مصر بعد إشارة صفقة الأسلحة التشيكية للجيش المصرى

ولما بدأ الزعيم الرائع عبد الناصر في اعاده بناء الجيش المصري يا عمي وجاءت العمليات الفدائية التى قادها الشهيد إبراهيم الرفاعى اعتبارا من منتصف يونيو ومعها ضربة الطيران المصري للقوات الإسرائيلية فى سيناء يوم أربعة عشر يوليو وتدمير المدمرة الإسرائيلية ايلات فى أكتوبر 1967 جاءت كل هذه الأعمال لتصرخ فى وجه العالم كله أن مصر لم تمت وانه إذا كانت قواتها المسلحة قد هزمت فى معركة فان روح مصر مازالت قوية صامدة
وصرخت اسرائيل تترجى امريكا بوقف اطلاق النار خوف من مصر ومن زعيمها ..

وفى 28 سبتمبر 1970 سقط الجسد وارتفعت الروح إلى بارئها

وانطلقت الجماهير العربية فى كل الدول العربية تنعى ناصر تنعى الحلم والأمل الذى فقدته وتقيم له الجنازات الشعبية حتى فى العواصم التى كان دائم الخلاف مع حكوماتها ولكنها خضعت لارادة شعوبها ونعته بما يليق به .

أما مصر فقد خرجت كلها تنعى الحلم والأمل والبطل الذى فقدته الإنسانية كلها .

وكانت جنازته فى مصر اكبر جنازة فى التاريخ البشرى لأنها كانت جنازة الحلم الذى فقدناه .

وطوى التاريخ سجله ورحل ينتظر لحظة أخري وبطل أخر أرجو أن يظلنا أوانه وزمانه فما أحوجنا إليه الآن.

هذا هو جمال عبد الناصر كما عرفته كأحد أبناء مصر وكأحد ابناء والدي الطيار الحربي واللذي حارب في معركه 73 عهد عبد الناصر ..

أيستحق هذا البطل كل هذا الظلم يا عمي فشكول ؟؟!
حقا لا اظن ذلك لانه انسان كان يحمل كل معنى جميل ورائع لشعبه وابناءه

elsha3er يقول...

بس انا ممكن اعاتبك يا مرمر عشان انتى كلام مش حلو فى حقى يعنى انا لايمكن اعيب فيكى لمجرد انك مختلفة عنى فى الرأى لكن انتى بوحتى لنفسك بكده على الرغم من انك ماتعرفنيش الا من بعض الصور والاراء الفكرية اللى انتى اصلا على ما اعتقد فهماهم غلط انتى وصفتينى

بعدو عبد الناصر ومحب لموشى ديان وانى بكرهه عبد الناصر كرهه العمى

دة بقى على اساس انى من جيش العدو ولا اية

واية الدليل انى بكرهه ناصر وبحب موشى ديان

انا مش عشان بقول اعطيناه اكثر من حقه ابقى بكرهه بالعكس بحبه واحب وطنيته لكن له سلبيات كتير بس كدة يعنى مش بكرهه

اما موشى ديان انا كرجل مسلم وعربى بكرهه طبعا
اما كرجل سياسى محارب يبقى دى شخصية لازم نقف عندها شخصيه زو زكاء سياسى يبقى لازم اتعلم منه واطبقه على اسلامى واعطيله وجه الخير

اعتقد كدة انا مش عدو عبد الناصر ولا بحب موشى ديان

وشكرا يا مرمر


احمد الشاعر

marmar يقول...

elsh3er :
انا لا يمكن ان اغلط فيك او في اي انسان اخر ابدا لاحترامي لنفسي قبل احترامي لغيري
بس هو عشان انا قلت اللي اتقال بدون ما زودت عليه ولا ألفته يبقى انا كده بتهجم عليك !!!

كلامك بالحرف الواحد في مدونتك اهو



موشى ديان انا بكرهه كرجل مسلم وعربى لكن ايه المانع انى اعجب بشخصيته واحاول اقلدها واستخدمها فى الخير مع تطبيق الاسلام ودة اقتباص من الغرب لكن فى الخير


اولا افيدك علما اسمه موشيه ديان بالعبريه ومعناها باللغه العربيه "القاضي موسى "
انت كلامك متناقض جدا يا شاعر موشيه ديان كل اللي عملوا قتل ناس ابرياء وقتل الاف مؤلفه من الناس ونظم عمليات ارهابيه اسرائيليه في بلدك ولله مش هقولك في بلد غيرك لا في مصر بلدك وكان بيخطط لاحتلال مصر وسوريا
وشارك في تسعه وتسعين من الحروب الاسرائيليه .. وقاد الجيش الاسرائيلي ابان العدوان الثلاثي 56

ده انسان هتتقيد بيه يا شاعر؟؟
جزاك الله الف خير


جمال عبد الناصر
رئيس من زاوية واحدة كان نصره فى المعارك نصر سياسى وخسارة عسكرية ودة مش مطلوب وجميل انه امم القناة ولكن سلبياته كتيرة يكفى محاولة قضائه على الاخوان وتقيد حريتهم ظهور بعض الفساد السياسى داخل مصر فى عهد عبد الناصر دة غير الهزايم العسكرية
بسبب الثقة الزايدة فى قواده زى عامر



ناس حاولوا يغتالوه وعملوا بأفظع الاعمال في عهدوا ومحاولات قتلو من قبلهم تكررت الاف المرات
متوقع منو ايه ؟
هيحبهم ويبوس راسهم؟؟

خليك واقعي شويه واتكلم بمنطلق انساني مش من واقع الكتب والمجلدات الغير صحيحه ..
وتاني مره بقولك يا شاعر انا لايمكن اتهجم عليك ابدا بالعكس رأيك انت حر فيه وانت مقتنع بيه وده عادي جدا
لكونك معاشرتش العصر ده والعهد ده
ومحدش حكالك عليه كويس ..
تحياتي ليك يا شاعر

elsha3er يقول...

حصل خير ولكن بالنسبة لديان فى له كتاب اسمه خطط من حياتى بيحكى الخطط العسكرية اللى كان بيستخدمها ديان ممكن استفيد من الخطط دى


المهم انك انتى ما تكونيش زعلانة


اخوكى احمد الشاعر

marmar يقول...

elsh3er :
استفيد انت بقى براحتك بس كوني مسلمه مواطنه مصريه بحب بلدي وبحب عبد الناصر لا يمكن استفيد من انسان حاول احتلال مصر ويأذي شعبها
مظنش كده هبقى مصريه بالروح والدم زي ما انا دلوقتي ..
عل عموم يا شاعر انا قلت انا مش زعلانه ابدا لكون شخص ما اتهم عبد الناصر بكلام مش ولا بد ده رأيك واسلوبك وانت ادرى بيهم ..
عادي يعني مش هيجيب معايا لا فوق ولا تحت خالص ..
تحياتي

ahmed_k يقول...

كل ده نقاش حول عبد الناصر وعهده
رغم أنه بعيد عن موضوع البوست تمام

لو تسمحولي أشارك برأي بسيط من عندي معكم في هذا النقاش القوي
الرئيس الراحل جمال عبد الناصر رحل عن دنيانا فهو في ذمة الله عليه وحده حسابه وعلينا ذكر محاسن موتانا
ولكنا عندما نذكر أخطائه فيتم ذكرها للتاريخ وحسب وليس هجوما عليه
وهو كأي حاكم بشر يخطئ ويصيب فلن يكون معصوما وهذه بديهيه
عبد الناصر رجل وطني محب لبلده أمر لا غبار عليه ولكنه وصل للحكم نتيجة ثوره قام بها وأختلف بين الضباط الأحرار حول قائد التنظيم فقد قيل أنه السادات في البدايه وعندما أعتقل في قضية أمين عثمان تحولت القياده لناصر
وقيل أنه ناصر من البدايه وهو الأرجح
ولكن المؤكد أنه لولا وجود محمد نجيب في واجهة التنظيم ما كتب له النجاح أبدا لكونه قائد كبير بعكس باقي الشخصيات فهم ضباط صغار فناصر بكباشي (مقدم) والسادات كذلك أما نجيب فلواء
وبخصوص الإخوان المسلمين فقد إشتركوا في حرب 48 ولم يتخاذلوا عن إعلان التأييد للثوره كما ذكر فسامي شرف رأيه لا يعتد به كثيرا سواء حول عهد ناصر والذي كان احد مصائبه أو عهد السادات الذي اعتقله
فالإخوان أيدوا الثوره بل كان ناصر والسادات حلفاء لهم في الجيش ولكن لننظر لأسباب الخلاف
حادثة المنشيه كانت تمثيليه أعدت ببراعه لكسر هذا التحالف وخدع ناصر من رجال الثوره فأطلق لهم العنان بعد ان كانوا ينقلون له انباء مشوهه عن جماعة الإخوان وأنشطتهم فلم يفكر الإخوان في إغتيال ناصر ولم يتخاذلوا ابدا عن تأييد الثوره ولولاهم لما نجحت بهذا الشكل بل هم بعض رجال مجلس قيادة الثوره أمثال صلاح سالم هم من اسباب البلاء
وناصر كان عاطفي وهذه كانت مشكلته ويثق في زملائه لحد كبير فسار معهم وهم
لم يعملوا يوما لصالح الوطن اللهم إلا القليل منهم
يا مرمر في عهد ناصر ظهر صلاح نصر أفجر من قاد جهاز المخابرات وصلاح سالم وعبد الحكيم عامر والعديد من الشخصيات اسائت بالفعل لعهد ناصر وللديموقراطيه في عهده
ومشكلته انهم كانوا في حمى عبد الحكيم عامر الذي كان يضعف امامه ناصر بشكل غامض رغم كل المصائب التي تسبب فيها
فمثلا حرب 67 خدع فيها ناصر حول جهوزية جيشنا لحر إسرائيل
خدع من من ؟؟؟ من عامر وقواده
والذي كان يعلم بأن الحرب آتيه لا محاله بعد إغلاق مضايق تيران ثم يأخذ هيئة أركان حربه في رحلة إستطلاعيه فوق سيناء فتتوقف الدفاعات الأرضيه عن العمل طوال ما هيئة الأركان في الجو وهنا حدثت المأساه بضرب الطيران المصر ودفاعنا الجوي على الأرض
فهو غيرة عن الشرف العربي أغلق المضايق ولكنه لم يكن قرارا صائبا لوجود قياده هزيله غير مسئوله عن الجيش
ولكن بعد تصفية تلك القيادات فالننظر لإنجازات حرب الإستنزاف رغم أنها كانت أكثرا خسارة لمصر لأننا كنا مازلنا في مرحلة البناء بعد إنهيار جيشنا في 67
لي عوده

ahmed_k يقول...

ما سبق كان بخصوص النكسه
أما الإشاره عن الديموقراطيه في عهد الملك فأنا أوافق مع التحفظ أنها أكثر ديموقراطيه عن عهد الثوره
ولكن البلد كانت محتله ولم تكن ديموقراطيه كامله فكان هناك الحرس الحديدي والبوليس السياسي الذي عذب دعاة التحرر والقضاء على النفوذ الإنجليزي في البلد
قد يقال أن الملك كان لاحول له ولا قوه ولكنها مأساه فكان افضل الحلول تكاتف الملك مع الشعب ولو بشكل سري للقضاء على الإنجليز وتواجده ولكنه كان نظاما ملكيا ضعيفا لا يملك من أمره غير المظاهر ومنح الألقاب والأبعديات

تاميم القناه عمل تاريخي لناصر لأنه لولا أخذهم على غرة كما فعل لما أستعدناها ولا بعد ألف عام وليس عشره كما يشاع
لأننا بلد مكبل بالديون فكانت ستعتبر ورقة ضغط وسيجدد العقد رغما عنا لأن حصة مصر في اسهمها كانت صفر
وكانت ستظل دوله داخل الدوله
فكانت المفاجأه قمة البراعه من ناصر ورجالات التاميم
وحرب 56 كانت متوقعه بسبب القرار ولكن الإنجازات لا تاتي دون تضحيات وبالفعل الإنسحاب كان بضغط دولي كما قال الشاعر ولكن ليس بسبب المقاومه الشعبيه فقط لنها كانت دور مقاوم بجانب الجيش وهذا أمر طبيعي والعدو كان يعلمه تماما

مما ذكرت فعهد ناصر كان مليئ بالإنجازات بالفعل وكان وطنيا كما لم يكن غيره من الرؤساء وبالفعل هو مات فقيرا من حيث المال ولكنه مات غنيا بحب الناس ودعاؤهم له
وأما الخيانات فهي لا تسيئ له ولكنها تسيئ للخونه أنفسهم
واعود لأقول أن عهده كان عهد رجل يخطئ ويصيب ولم يكن عهد نبي معصوم من الله

فتوجد أخطاء وتوجد ايضا الكثير من الإنجازات التي لا يمكن نكرانها

رحم الله الزعيم جمال عبد الناصر

marmar يقول...

ahmed_k :
أنا بشكرك يا احمد لرأيك عن عبد الناصر بس عايزة أوضحلك نقطة مهمة اوي بحكم اني بنت احد اللذين عاشوا هذا العهد واحبو جمال عبد الجمال مثلما يحبه ملايين ملايين من الشعب المصري وملايين من الشعوب الاخرى وحارب في تلك الفتره ايضا .. اولا كلامك عن الاخوان ودفاعك عنهم وكأنهم بالفعل لم يفعلوا شئ لكنهم بالفعل حاولوا واقدموا على تلك المحاوله الفاشله لاغتياله فى ميدان المنشية بمدينة الإسكندرية عام 1954 مع العلم انه كان بيعاملهم معامله كويسه جدا لانهم يعتبرو ضمن المسلمين المصريين وللأسف لم يعملوا اي اهتمام بذلك ..
ولم ننسى عندما أعلنت المخابرات المركزية الأمريكية وقوفها خلف سلسلة انقلابات في عدد من دول أفريقيا التي تجاوبت مع جهود عبد الناصر الرامية إلى إقامة تضامن آسيوي أفريقي في إطار حركة عدم الانحياز.
في هذه الظروف تحرك الإخوان المسلمون لقلب نظام الحكم واغتيال جمال عبد الناصر وفشلت خطة الإخوان في ذلك الامر واعتبرت تلك اولى محاولتهم لاغتيال الرئيس بسبب فكرهم البعيد كليا وتماما عن ما يقدمه الزعيم عبد الناصر لاجل ابناءه وابناء مصر ..
كتاب "أيام من حياتي" شرحت زينب الغزالي مؤلفته مؤامرة عام 1965م التي كانت واحدة من الضالعين فيها وحكم عليها بالسجن 25 عاماً ثم أفرج عنها السادات في أوائل السبعينات أثناء تحالفه مع الإخوان المسلمين.
تروي زينب الغزالي في الباب الثالث من كتاب "أيام من حياتي" تفاصيل مثيرة عن علاقاتها بالقيادي الإخواني الشيخ عبدالفتاح إسماعيل الذي تعرفت عليه في السعودية عام 1957م، وفجر لها العديد من المفاجئات حول علاقة الاخوان وكرهم لجمال عبد الناصر بسبب حبه للشعب وغيرتهم منه بسبب قوته وجبروته وخوف الناس منه ..
وفي شهادة أخرى اعترف القيادي الإخواني احمد عبد المجيد في كتابه الصادر عام 1991م بعنوان "الإخوان ومعركتهم مع عبد الناصر" انه بحث خطة اغتيال عبد الناصر مع سيد قطب وان تمويل التنظيم كان يأتي من الخارج، وانه كان يتم تدريب الشباب على وضع القنابل والمتفجرات، مشيراً إلى أن لقاءً سرياً انعقد في منزل علي العشماوي بحي (شبرا) وحضر هذا اللقاء الشيخ عبدالفتاح إسماعيل والشيخ محمد فتحي رفاعي.. وقد طرحت في هذا اللقاء مأمورية اغتيال جمال عبد الناصر وانهم على صلة بالأستاذ المرشد حسن الهضيبي.. وانهم استأذنوه لهذا العمل فوافق. وبالتالي يعتبر هذا العمل شرعياً لانه موثق من ولي الأمر والقيادة الشرعية!!
من جانبه اعترف علي عشماوي في مذكراته التي نشرها بعد اطلاق سراحه في عهد السادات أن الإخوان حاولوا قتل عبد الناصر سنة 1954م وكرروا ذلك مرة أخرى سنة 1965م، واعترف أيضاً بخططهم للنسف والتدمير وتخزين الأسلحة، كما تحدث عما اسماها مجموعة "البحث العلمي" التي كانت تضم خريجي الإخوان من كليات العلوم قسم الكيمياء الفيزياء الأحياء ، وخريجي كلية الهندسة وباحثين في المركز القومي للبحوث والطاقة الذرية وكانت مهمة هذه المجموعة إجراء البحوث والتجارب على صنع المتفجرات والأحزمة والمواد الناسفة والقنابل والسموم، خصوصاً وان احدى خطط الاغتيال كانت تشتمل على بدائل وخيارات عديدة بينها قتل جمال عبد الناصر بالسم أو تفجير بيته ..
الناصر بالسم.
ثمة اعتراف آخر لأحد المشاركين في مؤامرة 1965م وهو القيادي الإخواني احمد رائف الذي اعتاد على الظهور في قناة (الجزيرة) لتشويه صورة الرئيس جمال عبد الناصر واعترف بخطة اغتيال عبد الناصر التي وضعها عبد العزيز علي وبحصولهم على أسلحة من إخوان السعودية....
بعد ده كلو يا احمد بتدافع عن الاخوان على اعمالهم القذره اتجاه عبد الناصر .. !!!
طب ازاي وهما علموا كل ده فيه في حين انه معملش حاجة تأذيهم !!

يعرف المصريون جيداً منجزات عبدالناصر وأعماله التي استقرت في ضمائرهم وعاشوها واقعاً ملموساً.. وعلى أساسها واصل بناء مصر الحديثة، مهما حاول الإخوان المسلمون تشويه منجزات مصر عبدالناصر تحت ستار الدين.. ومهما حاول المتاجرون باسم عبدالناصر السكوت أمام هذه الهجمة التي يتعرض لها القائد الراحل من خلال ممارسة أرخص أنواع النفاق السياسي والتحالفات الانتهازية مع أعدائه التاريخيين الحاقدين.
ويبقى القول إن عبدالناصر عاش من أجل خدمة قضايا وطنه وشعبه وأمته، وكان يجسد القيم الاسلامية الأصيلة في حياته الخاصة والعامة.. وضد كل ما يسيئ الى الاسلام تسييساً واستغلالاً ونفاقاً وكذباً وقتلاً وإجراماً
ويكفي دموع ملايين لا تعد ولا تحصر في يوم جنازته التي لو اجمعوها لكانت تملأ أكبر بحيره في العالم ..
انا فخورة انك بتدافع عن عبد الناصر يا احمد على عكس ما قام به البعض من كلام يسئ له ويسئ لي بالفعل كوني انتمي لهذا الاب الروحي عاطفيا وفكريا وعقليا بل وروحيا ايضا ..
بالفعل يا احمد عبد الناصر انفق كل ما لديه قبل موته على شعبه الحبيب على عكس ايضا ما فعله كل من حكم مصر بعده .. ربنا يرحمك يا عبد الناصر ويكتر من محبينك يارب

الله يرحمك يا عبد الحليم لم قلت في ناصر اجمل كلام واجمل وصف بجد :

الحكاية مش حكاية السد
حكاية الكفاح اللى ورا السد .. حكايتنا احنا
حكاية شعب .. شعب للزحف المقدس قام وثار.. شعب زاحف خطوته تولع شرار
شعب كافح و انكتب له الإنتصار ..
هى حكاية حرب و تار بينا و بين الإستعمار فاكرين
لما الشعب اتغرب جوه فى بلده
اه فاكرين
و المحتل الغادر ينعم فيها لوحده
مش ناسيين
و المشانق للى رايح و اللى جاى
ودم أحرارنا اللى راحوا فى دنشواى
آه فاكرين
من هنا كانت البداية و ابتدا الشعب الحكاية كان كفاحنا
بنار جراحنا يكتبه دم الضحايا
و انتصرنا انتصرنا
انتصرنا يوم ما هب الجيش و ثار
يوم ما أشعلناها ثورة نور و نار
يوم ما أخرجنا الفساد يوم ما حررنا البلاد
يوم ما حققنا الجلاء و انتصرنا
انتصرنا انتصرنا

هنفضل رافعين راسنا بزعيمنا لأخر يوم في حياتنا كلنا وانا اول من هرفع راسي فخر بالاب الزعيم السياسي قائدنا رافع رايتنا بالاب الروحي الرئيس"جمال عبد الناصر"رحمه الله عليه.

اعشق فى الليل ضوء القمر يقول...

الفكره يا مرمر
على فكره عجبنى إسمك بس نرجع لموضوعنا
ممكن الواحد يساعد بس يساعد مين
شيخ حضرت ليه درس وقال لو سألك أحد على مال فلا تعطى له إلا لو كنت تعلم إحتياجه فعلا لكن لو سألك على طعام فوجب عليك إطعامه
حكيلك على حاجه
مره راجع للبيت ووجدت بنتين بتسأل على فلوس علشان يروحوا ومعاهم أمهم فقلت لهم منين أنتن قالت مش كفر الشيخ قلت لها طعالى أعرف سائق فى الموقف تركبن معه ومش هياخد فلوس طبعا أنا معرفش حد بس كنت ناوى لو رحنا الموقف كنت دفعت الفلوس لسفرهن لكن لقيت الوضع إختلف لإما الفوس لإما بلاش قلت يمكن خيفين منى طيب الموقف فى عبود وإحنا فى المظلات يعنى الموضوع كله مفيش 3 دقائق
ومن ساعتها حرمت إلا لمن أعلم حقا إحتياجه
وجعت دماغك
سلامى ليكى

marmar يقول...

أعشق في الليل ضوء القمر :
انت كنت عايز تساعد بس معرفتش تساعد ازاي مهو مش شرط المساعده تكون بفلوس والناس اللي قابلتها دي اكيد لو نيتهم خير في الفلوس دي وعايزنها بجد كانوا هيتقبلوا منك فكره توصيلهم للموقف .....إلخ
الفكره اننا ممكن نساعد ناس بكلمه بنصيحه بموقف بعبره بمثل بحكمة بحاجات مش هتكلفنا اي حاجة
يعني انا لو مكانك وقابلت الناس دي هحس اذا هما بجد محتاجين الفلوس ولا لا ولو حسيت انهم فعلا هيروحوا وعايزين الفلوس هديهم بس لو شحاته من غير داعي هنصحهم وامشي ...
والموقف فعلا يخليك تحرم تساعد حد الا اللي يحتاج المساعده فعلا ..
بس مش معنى كده انك تبطل المساعده للناس والنصيحه لهم بالخير ...
لان الناس علينا حق زي ما على نفسنا حق
اسم ايه بقى اللي عاجبك يا فندم ؟؟
ألفهولك طيب ؟؟

Hossam يقول...

صديقتى مرمر
وحشتينى
عندك حق بس تفتكر الغلط عل الريس والقاضى والحكومة بس؟معتقدش
والحدء يفهم
تحياتى صديقتى
سلام

اعشق فى الليل ضوء القمر يقول...

عايز أعرف رأيك

ملتقى الصحبه

marmar يقول...

hossam :
اهلا بأخويا الصغير واخ الصغير لكل المدونين ..
لا ولله الغلط احنا اللي عملناه وخليناه يعم عل كل الريس طبعا غلطان كونه ريس بيحب شعبو زياده حبتين
ربنا يستر بجد
دمت بخير يا اخويا الصغير.





***********************************

أعشق في الليل ضوء القمر :
عذرا لم افهم شئ من مدونتك الجديده اعتقد انها نفس فكره مدونات مصريه للجيب لذلك لا اعتقد انني سوف افيدك في هذا .. ان شاء الله تلاقي طلبك في بعض المدونيين الاخريين .
سلام

حازم سويلم يقول...

رائعة يا مرمر
تكلمتى بلسان ناس كتير
تحياتى

*shosho* يقول...

السلام عليكم ورحمة الله وبركاته
جميل جدا جدا البوست
بجد انا لمابشوف الاطفال دول قلبي بيتقطع عليهم

~~~~~~~~~~~~~~~~~~~~~
الذئبة الكبننه بتقولك تعالي شوفي التاج بتاعها في المدونة
أنا أختها على فكرة
الذئبة الصغننة ههههههههههههههه

تحيتي لك..

بـسـمـــة صـــــلاح يقول...

انتي ياهبابة الطين يامنيله
وحشتيييييييييني
انتي يامنيله عملت ادد للايميل
بعدين عايزين بوست جديد ياهانم
حفظنا البوست دا
هههههههههههههههه
يلا يانيله
مع تحيات *ذئبـــة كبننــة*

يا مراكبي يقول...

قال رسول الله صلى الله عليه وسلم: كلكم راع وكلكم مسؤل عن رعيته

وسيسأل الله عز وجل هؤلاء المسؤلين يوم القيامة عن مدى تحملهم للأمانة وعن سبب تفريطهم فيها بهذا الشكل

لكن يبدوا أنهم غير قلقين من حساب الله .. سبحان الله

محمد سمير يقول...

موضوع جميل جدا و أحنا فعلا عارفين بس هنعمل اية غير ان احنا نساعدهم بس مش هنقدر نبنلهم بيوت و لا الحجات الكبيرة دى المفروض الدولة تاخد بالها و ربنا يرحمهم من الدنيا الى مابتسبش الواحد فى حالوه ربنا يحفظ مصر بأولادها

marmar يقول...

حازم سويلم :
اشكر اطرائك الجميل
تحياتي




***********************************

شووووووووووووووووووووووشو:
ايه النور ده كله حبيبتي اخت الذئبه هنا منوراني يا كتكوته
ماشي مش هروح عند ذئبه ومش هعلق عندها حاضر
"وش بيطلع لسانه"
منوره يا كتكت



**********************************

بسمة صلاح :
هبابه ومنيله وطيب الله الله ليلتك سوده
انتي يا بت انا اكبر منك بتلات سنين
يا طفلةةةةةةةةةةةةةةةةةةةةةةةة
فين ايام زمان ايام لما كنتي بتبوسي ايدي هييييييييي هييييييييييه
يلا الزمن راح وراحت ايامه الحلوة
ما تروحي معاه عشان اخلص؟؟

marmar يقول...

يا مراكبي :
هيا لو جت انهم مش قلقين من حساب ربنا ف ده امر طبيعي على اللي بنشوفه من الناس اليويمن دول
ربنا يرحمهم ويرحمنا برحمته يارب
انا قلبي بيوجعني من منظر الاطفال دول بجد وياريت حد بيسأل ولا حكومه بتهتم بجد منهم لله .
دمت بخير




***********************************

محمد سمير :

اهلا بيك بأول زياره ليا ولمدونتي
هيا الدوله يا محمد من امتى بتاخد بالها من شعبها عشان تاخد بالها من اطفال شوارع بلدها
الدوله مشغوله بالسرقه والنصب مش فضيالهم ولا بتعملهم اعتبار
بس احنا كشعب في ايدينا نغيرهم ونغير اللي بيحصل بس لو الكل قال وانا مالي خليني في حالي
مش هنعرف لا نتغير ولا نغير
تحياتي

hasona يقول...

السلام عليكم
أخبارك ايه؟؟ يا رب تكون بأحسن حال؟؟
أنا الحمد لله بخير
،،،
حضرتك عبرتي عن حالنا
ناس فوق وناس تحت
ناس هايصة وناس لايصة
والمسئولين من القمة (الرئيس ) الي القاع ( مدير في أي مكان) ولا علي بالهم شئ -مجرد كلمات جوفاء
وفي كل مناسبة يقولوا
مصر في أزهي العصور
احنا أفضل من غيرنا
لا الريس ولا الوزير حاسس بما فيه الشعب
والادهي من ذلك عندما يتحدثون - نشعر أنهم يتحدثون عن بلد أخري غير التي نعيش فيها
،،،
والصدمة الاكبر
تحول وتغير الشعب الي السلبية المفرطة
لا أحد يهتم - الا عندما تطوله تلك المساوئ
تحت شعار امشي جنب الحيط - خليني أكل عيش

عندما يسرق الحاضر ويدمر المستقبل

هل تعتقدي بأن النشأ سيتحمل المسئولية التي لم نستطيع تحملها؟؟

خايفين من المستقبل
أطفال ضاع أملهم في الحياة في الحلم في البراءة

أتمني أن نستطيع التغيير قبل فوات الاوان

تحياتي

About Me

صورتي
تقدروا تقولوا بنوتة متواضعه بحب كل الناس مجنونه و عاقله حزينه وفرحانة طفله وكبيرة طيبه وشريرة فيا كل الصفات بس اولهم واخرهم رومانسية وحالمة وده عشان بحب ابتسامه كل حد. وبحب اشوف ضحكه اي طفل وفرحتو على وشوا وضحكه اي ست على وشها بحب اشوف الفرحه في عيون الناس بحب اضحك اي حد مضايق واسمع همومه يحكيلي واحكيلو .